"ერთიანი ნაციონალური მოძრაობის" თავმჯდომარის, ნიკა მელიას ადვოკატმა გიორგი კონდახიშვილმა სასამართლო პროცესზე განაცხადა, რომ ქართული სასამართლოს პრაქტიკის ისტორიაში მელია ერთადერთი ბრალდებულია, რომელსაც თითქოს, გირაოს პირობების დარღვევის გამო ისევ გირაო შეეფარდა.

ადვოკატის განმარტებით, სამაჯური, რომელიც მელიას ეკეთა, ბიჟუტერიის ფუნქციას ატარებდა და ეს პროკურატურამაც კარგად იცოდა - მისივე თქმით, "კანონს როგორც უნდათ ისე ჭრიან და კერავენ".

"საქმე, რომლის ირგვლივაც ვართ შეკრებილი, უპრეცედენტოა, ეს არის საქმე, რომელზეც აქამდე არსებული ყველა სამართლებრივი პრაქტიკა იცვლება.

ნიკა მელია პირველი ბრალდებულია, რომელსაც გირაოს პარალელურად ელექტორნული მონიტორინგი დაუწესდა. ნიკა მელია პირველი ბრალდებულია, რომელსაც საჯაროდ გამოსვლის უფლება შეეზღუდა.

ქართული სასამართლოს პრაქტიკის ისტორიაში მელია ერთადერთი ბრალდებულია, რომელსაც თითქოს, გირაოს პირობების დარღვევის გამო ისევ გირაო შეეფარდა, თან დამატებითი შემზღუდავი ღონისძიებები გაუუქმეს და ეს გამკაცრებად შეფასდა.

პარადქოსია, მაგრამ მელია ის ბრალდებულია, რომლის ერთიდაიგივე ქმედებაც პროკურატურის მხირიდან ხან სანიმუშო ქცევად ფასდება, ხან აღკვეთის ღონისძიების პირობების დარღვევად.

მელია ის გამონაკლისია, რომელსაც პროკურატურა და პარლამენტი მოსამართლის განჩინების მიღმა გირაოს გადახდის ვადას უწესებს. მელია ის ბრალდებულია, რომელთანაც გირაოს განმარტების შედგენის ოქმიც არ განხორციელებულა.

მელია ერთადერთი ბრალდებულია საქართველოს ისტორიაში, რომელსაც პარლამენტის ორმა სხვადასხვა შემადგენლობამ საპარლამენტო იმუნიტეტი მოუხსნა, რომლითაც საპარლამენტო იმუნიტეტის ცნება ფეხქვეშ გათელა",- განაცხადა კონდახიშვილმა.