"მელია ახალი ეროვნული მორაობის სიმბოლოა, საზოგადოება ნიკას გვერდში დგას, პოლიტიკური სპექტრი მის გვერდითაა... არავის გავატანთ"

"მელია ახალი ეროვნული მორაობის სიმბოლოა, საზოგადოება ნიკას გვერდში დგას, პოლიტიკური სპექტრი მის გვერდითაა... არავის გავატანთ" - ბაჩუკი ქარდავა

პოლიტიკა - 17:36, 17 Feb, 2021

674

ეროვნულ-დემოკრატიული პარტიის ლიდერი ბაჩუკი ქარდავა ენმ-ს ოფისში ნიკა მელიას მხარდასაჭერად იმყოფება. მან ცოტა ხნის წინ ჟურნალისტებთან გააკეთა კომენტარი და აღნიშნა, რომ მზად არიან ყველაფრის ფასად დაიცვან ოპოზიციონერი ლიდერი, რომელიც ქართული ეროვნული მოძრაობის სიმბოლო გახდა. ქარდავას განცხადებით, ქართული საზოგადოება მელიას გვერდით დგას და ეს ერთობა უპრეცედენტოა:

"ამ დღეების განმავლობაში ჩვენ მომსწრეები გავხდით იმ უპრეცედენტო გაერთიანების, რომელიც შედგა დიდი ხნის წინ, მაგრამ ის გაერთიანება დღეს ხდება ნაციონალური მოძრაობის ოფისში ქართული საზოგადოების წარმომადგენლებთან და პოლიტიკური სპექტრის ლიდერებთან ერთად, ეს არის ნამდვილად უპრეცედენტო. გამოცდილება ასე ამბობს, რომ ამ ტიპის ერთობები, მაშინ, როდესაც ეს ერთობა ხდება სამართლიანი საქმის გარშემო, აუცილებლად გამარჯვებით სრულდება. ის, რომ ნიკა მელიას ვერ დაიჭერენ, ალბათ ცხადზე ცხადია და ამის უკვე აღარ სჯერა ყველაზე ოპტიმისტურად განწყობილ ქართული ოცნების წარმომადგენელსაც კი. იმიტომ არ სჯერა, რომ ქართული საზოგადოება ნიკას გვერდში დგას, პოლიტიკური სპექტრი მის გვერდითაა. ძალიან მოკლედ გეტყვით რატომ - ერთ მხარეს არის ქართული საქმე, აქ არის მოძრაობა, წინააღმდეგობა, ქართული საქმის სასარგებლო, მეორე მხარეს არის გავრილოვი და რუსეთის ინტერესები, გაყალბებული არჩევნები, არალეგიტიმური პარლამენტი და ა.შ. ასე, რომ ქართული საზოგადოება აუცილებლად გამარჯვებული დარჩება ამ ბრძოლაში, რომელსაც ის მართავს ქართული ოცნებისა და ბიძინა ივანიშვილის წინააღმდეგ და მართავს იმიტომ, რომ ქართულმა სახელმწიფოებრიობამ განაგრძოს განვითარება.

ის, რომ აქ უამრავი ადამიანია, არა მხოლოდ პოლიტიკოსები, ასევე თავისუფლად მოაზროვნე ადამიანები, მეტყველებს იმაზე, რომ ისინი მზად არიან ფიზიკურად დაიცვან ნიკა მელია და ისინი ამ დროს იცავენ არა კონკრეტულად მელიას, ისინი იცავენ ქართულ საქმეს. როდესაც სასწორზე დგას ქართული ინტერესები, დამერწმუნეთ, საზოგადოება აუცილებლად გამარჯვებული გამოვა ამ ბრძოლაში.
ჩვენი გეგმა მარტივია - შევინარჩუნოთ ერთიანობა და მას აუცილებლად შევინარჩუნებთ, დავიცვათ და არ გავატანოთ ნიკა მელია არც ერთ შემთხვევაში, იმიტომ, რომ ის დღეს არის სიმბოლო ქართული საქმის და რაც არ უნდა გაწელოს დრო საქართველოს დღევანდელმა ხელისუფლებამ, ჩვენ მზად ვართ არ დავიღალოთ, ეს ბრძოლა ჩვენი გამარჯვებით დასრულდება ყველაფერზე წასული ხელისუფლება ყველაფერს კარგავს!" - განაცხადა ბაჩუკი ქარდავამ.