მელია: "ერთ მხარეს დგას ქართული ეროვნული მოძრაობა, მეორე მხარეს კი - ოკუპანტების ინტერესი... რა გადაწყვეტილებაც არ უნდა გაფორმდეს, ეს შიშით იქნება ნაკარნახევი"

პოლიტიკა - 17:16, 17 Feb, 2021

639

ამ წუთებში თბილისის საქალაქო სასამართლოში ნიკა მელიას საქმის განხილვა მიმდინარეობს. პროცესს არ ესწრება ენმ-ს თავმჯდომარე. ის ნაციონალური მოძრაობის ოფისიდან ადევნებს თვალს პროცესის პირდაპირ ტრანსლაციას.

ჟურნალისტებთან საუბარში მელიამ განაცხადა, რომ გადაწყვეტილება, რომელიც სასამართლოზე გაფორმდება, იქნება შიშით ნაკარნახევი და განაჩენი ოცნებას წინასწარ აქვს გამოტანილი:

"ნებისმიერ შემთხვევაში, რა გადაწყვეტილებაც არ უნდა გაფორმდეს, მიიღონ არა, გადაწყვეტილებას იღებენ მაშინ, როდესაც მსჯელობენ, როცა რაღაცას აანალიზებენ და აქედან გამომდინარე დასკვნა გამოაქვთ და მერე განაჩენს წერენ, უბრალოდ გააფორმებენ იმ გადაწყვეტილებას, რომელიც პოლიტიკურად ქართულმა ოცნებამ უკვე მიიღო, ორივე შემთხვევაში ეს იქნება შიშით ნაკარნახევი, იმიტომ, რომ ორი გადაწყვეტილება იქნება, ერთი - მურუსიძის სასამართლოს გააფორმებინებენ პატიმრობას, რომელიც იქნება შიშით ნაკარნახევი და მეორე შემთხვევაში არდაპატიმრებაც ანუ სანქციის გაცემა არდაპატიმრების თაობაზე ასევე იქნება შიშით განპირობებული. აი, შიშ რას გააკეთებინებს დღეს ქართულ ოცნებას, სანქციას გამოატანინებს დაპატიმრებაზე თუ პირიქით, ამას დაველოდებით და ვნახავთ.

გავრილოვის საქმეზე და გავრილოვის დავალებით ვერც ერთ საქართველოს მოქალაქეს ვერ დაიჭერენ. ერთ მხარეს დგას ქართული ეროვნული მოძრაობა, აქ უკვე აღარაფერ შუაშია პარტიული ნიშანი, მეორე მხარეს კი დგას ოკუპანტების ინტერესი. ახლა ჩვენი არჩევანია, ვინ სად დადგება. ოცნების წევრები პოლიტიკოსები არ არიან, ისინი პოლიტიკაში დასაქმებულები არიან და მათი დამსაქმებელი ივანიშვილია" - განაცხადა მელიამ.