ოცნების დეპუტატის ლადო კახაძის განცხადებით, გასაკვირი არაა, რომ გერმანიაში სამუშაოდ წასვლის მსურველთა რაოდენობა ერთ დღეში 36 000-მდე დაფიქსირდა. მისი განმარტებით, საქართველოს ეკონომიკა არ არის ისეთი განვითარებული, რომ ამ ტევადობის ადამიანი დაასაქმოს. კახაძე აღნიშნავს, რომ ჩვენი მოქალაქეებისათვის გერმანიაში ლეგალური დასაქმების ფაქტორი ძალიან მნიშვნელოვანია:

"ჩემს ახალგაზრდობაში, მაშინ საბჭოთა კავშირი იყო, საქართველოდან სამუშაოდ მიდიოდნენ ჩრდილოეთ კავკასიაში, მიდიოდნენ უზბეკეთში. საერთოდ ასეთია წესი, მაგრამ ეს უნდა მოხდეს ლეგალურად, როდესაც აქედან იქნება სახელმწიფოს თანხმობა და დამალვა არ იქნება საჭირო. თუ ჩვენთან იქნება სამუშაო ადგილი, აქ მოვა ადამიანი. გერმანიაში მიდიან, გერმანიას თავისი საწარმოო პოტენციალის ასათვისებლად რესურსი არ გააჩნია. ჩვენ არ ვიცით, რომ ჩვენი ეკონომიკა იმ ტევადობის არ არის, რომ ბევრი ადამიანი დაასაქმოს? ჩვენ განვითარებად ეკონომიკა გვაქვს და ვცდილობთ მაქსიმალურად.

ადამიანებს, რომელთაც სახელმწიფოს მხარდაჭერით, ლეგალურად შეეძლებათ 3 თვით წავიდნენ, ამაში ცუდს რას ხედავთ? ჩვენ ხომ ვიცით, რომ გვიჭირს და მაქსიმალურად გვინდა, ადამიანმა შემოსავალი იშოვოს. ჩვენ რამდენი მეცნიერი გყვავს, ექიმი, ფილოსოფოსი, "აიტიშნიკები", რომლებიც წავიდნენ და უფრო ძვირადღირებულ ბაზარზე უფრო მეტი შემოსავალი მიიღეს. ის შემოსავალი მერე აქ უნდა შემოვიდეს, მერე შემოსავალი აქ რომ დაგროვდება, აქ შეიქმნა პოტენციალი. ეს გზა გასავლელი გვაქვს", - განაცხადა კახაძემ.

შეგახსენებთ, რომ გუშინდელი მონაცემების თანახმად, გერმანიაში დროებით დასაქმების პორტალზე ერთ დღეში საქართველოს 35 121 მოქალაქე დარეგისტრირდა. დასაქმების ხელშეწყობის სახელმწიფო სააგენტოს ინფორმაციით, გერმანიაში დასაქმება სეზონურ სამუშაოებზეა შესაძლებელი და ის სოფლის მეურნეობის სექტორს მოიცავს. ჩვენს მოქალაქეებს იქ დასაქმება მხოლოდ 3 თვით შეეძლებათ, ხოლო სეზონური სამუშაოები 1 აპრილიდან დაიწყება.