ნაციონალური მოძრაობის წევრის გიორგი ბოტკოველის შეფასებით, ნიკა მელიასთვის წარდგენილი ბრალი არ არის მხოლოდ მელიას მიმართ სადამსჯელო ღონისძიება, ეს არის ყველა იმ ადამიანის დასჯის მცდელობა, რომელიც 20 ივნისს ქვეყნის ეროვნულ ღირსებას იცავდა. ბოტკოველის თქმით, ნაციონალური მოძრაობა ყველა კანონიერ გზას გამოიყენებს იმისთვის, რომ ოცნებას თავისი ჩანაფიქრის აღსრულებაში შეუშალოს ხელი:

„ქართული ოცნების“ მხრიდან არაფერი მოულოდნელი არ არსებობს, მაგრამ ერთი რამეა მთავარი, ის გადაწყვეტილება, რომელიც გუშინ მიიღო ე.წ არალეგიტიმურმა პარლამენტმა, დარწმუნებულ ვარ, გახდება კიდევ ერთი დამატებითი საკითხი ამ პარლამენტის არალეგიტიმაციის, იმიტომ, რომ იქ მიღებულია გადაწყვეტლება არა რომელიმე კონკრეტული პარლამენტის წევრის მიმართ, ამ შემთხვევაში, ნიკა მელიას მიმართ, არამედ ამ ქვეყნის საწინააღმდეგოდ, რომელიც პირდაპირ ემსახურება რუსულ წარმომადგენლობას საქართველოში, ამ შემთხვევაში, „ქართული ოცნების“ ქმედებებს და გავრილოვის დავალებას, რომელიც მან მიიღო საკუთარი ხელმძღვანელობისგან და უკვე გადასცა „ქართული ოცნების“ წარმომადგენლობას. ეს არის ბრალი, რომელიც არ არსებობს, ეს არის ბრალი, რომელიც არის შეთითხნილი და შექმნილი იმისთვის, რომ ბოლომდე გაანადგურონ ქართული სახელმწიფოებრიობა და დასაჯონ არა ნიკა მელია, არამედ ყველა ის ადამიანი, რომელიც 20 ივნისს იდგა იქ და გამოთქვამდა თავის სამართლიან პროტესტს ამ ქვეყნის გადარჩენისთვის. ვერაფერს ვერ იზამს „ქართული ოცნება“, მთავარი არის ერთი რამე, სიმართლე დგას ამ შემთხვევაში, ნიკა მელიას მხარეს. ჩვენი ქმედება იქნება ყველაფრით გამართლებული, ის, რომ ჩვენ ნებისმიერი ჩვენი ქმედებით არ მივცემთ „ქართულ ოცნებას“ და ამ ხელისუფლებას უკანონო ქმედების განხორციელების უფლებას. ამ დღეების განმავლობაში მუდმივად არა მარტო ნიკა მელიას, არამედ ყველა ჩვენგანის მხრიდან ჟღერდება ერთი მთავარი რამ, რომ ვერანაირად ვერ განახორციელებს იმას „ქართული ოცნება“, რომ დააკავონ ნიკა მელია,“- განაცხადა გიორგი ბოტკოველმა.