ოცნების დეპუტატის მაია ბითაძის განცხადებით, ნიკა მელიას საშუალება ჰქონდა პარლამენტში შესულიყო და საკუთარი უფლებამოსილება "ცირკის დადგმის" გარეშე განეხორციელებინა. ბითაძის შეფასებით, მელიამ არ გამოიყენა პროკურატურის მხრიდან ლმობიერი დამოკიდებულება და უარი განაცხადა გირაოს გადახდაზე:

„ძალიან მარტივი საკითხია. საქმე გვაქვს გარკვეულწილად პოლიტიკურ ცირკთან, რომლის დადგმის სურვილი აქვს ნიკანორ მელიას. თუმცა, აქვე მოვუწოდებ, მას ჰქონდა საშუალება შემოსულიყო პარლამენტში, ემუშავა და განეხორციელებინა თავისი უფლებამოსილება ყველანაირი ცირკის, სამაჯურის გადაგდების და მოხსნის გარეშე. არ გამოიყენა ის კანონისმიერი ლმობიერი დამოკიდებულება პროკურატურის მხრიდან რასაც გირაოს გადახდა ჰქვია. მიზნობრივად ახორციელებს აჟიოტაჟის ატეხვის მცდელობას, ამას მხარს უბამს რადიკალური ოპოზიციის მხრიდან გარკვეული ნაწილი. დღეს ჩვენ მომსწრე ვართ იმის, რომ მთლიანად პოლიტიკური სპეკულაციების რეჟიმში ცდილობენ გადაიყვანონ სამართლებრივი სახელმწიფო, რაც მიუღებელია. აქვს ნიკანორ მელიას საშუალება, როგორც დღეს, ისე ხვალ, გადაიხადოს გირაო, მშვიდად წყნარად გააგრძელოს საქმიანობა, მანამ სანამ საქმე საბოლოოდ არ იქნება გამოძიებული. სამართლებრივი საკითხი პოლიტიკურ ჭრილში გადაჰყავთ. კიდევ ერთხელ მოვუწოდებ მათ, შეეშვან დამუქრებას, ცირკის, სპექტაკლების დადგმას. პოლიტიკური თამაში არ არის სამართალთან კავშირში“, - განაცხადა ბითაძემ.

შეგახსენებთ, ამ წუთებში პლენარულ სხდომაზე ნიკა მელიასთვის მანდატის გაუქმების საკითხს განიხილავენ.