გავრილოვის მასპინძელი "ქართული ოცნება" ჩიხშია - 20 ივნისის სისხლიანი ღამის ავტორების მუქარა დემოკრატიულ ოპოზიციას

პოლიტიკა - 13:21, 16 Feb, 2021

1023

"ქართული ოცნება" ოპოზიციას კრემლთან კავშირში ადანაშაულებს. მმართველი პარტიის სპიკერი, მამუკა მდინარაძე აცხადებს, რომ რუსეთის კომუნისტური პარტიის წევრის, სერგეი გავრილოვისა და ნაციონალურუი მოძრაობის მოქმედებები თანხვედრაშია.

"20 ივნისი ეს იყო გავრილოვის პროვოკაცია და მელიას ღამე"- ამბობს მდინარაძე და ირქმუნება, რომ "პროვოკაციას აღკვეთავენ 2021 წელსაც".
"სერგეი გავრილოვი რადიკალური ოპოზიციის მოკავშირე პროვოკატორი და მაშველი რგოლია. პუტინის რუსეთი ყოველთვის აკეთებს იმას, რაც სჭირდება ნაციონალურ მოძრაობას და დესტაბილიზაციას საქართველოში. ნაციონალური მოძრაობა ყოველთვის აკეთებს იმას, რაც სჭირდება პუტინის რუსეთს და დესტაბილიზაციას საქართველოში. ნაცმოძრაობის ანტირუსული რიტორიკა ყალბია. ნაცმოძრაობის პროდავასლური რიტორიკა შესაბამისად, კიდევ უფრო ყალბია. 20 ივნისი ობიექტურად შეიძლება შეფასდეს, როგორც "გავრილოვის პროვოკაციის დღე და მელიას ღამე". ნიკანორ მელია შეგნებულად და კონკრეტული მიზნით გადის კანონის ჩარჩოებიდან. ე.წ. გაყალბებული არჩევნების ჩავარდნილი და მხილებული პროექტის ფონზე, ნაცები დახმარებისთვის ისევ გავრილოვს მიმართავენ. გავრილოვი-მელიას 2019 წლის 20 ივნისის დესტაბილიზაციის გეგმა ჩავარდა, გავრილოვი-მელიას 2021 წლის თებერვლის დესტაბილიზაციის გეგმაც ჩავარდება. ამაზე ქართული სახელმწიფო იზრუნებს"- აცხადებს მდინარაძე.

შეგახსენებთ, რომ სერგეი გავრილოვმა "ტვ პირველთან" კმაყოფილება ვერ დამალა ნიკა მელიას შესაძლო დაკავების გამო.
მისი თქმით, ოპოზიცია 20 ივნისს სახელმწიფიო გადატრიალებას ცდილობდა. ეს განცხადება ერთი-ერთში ემთხვევა ქართული ოცნების რიტორიკას.