ოცნების დეპუტატის დავით სერგეენკოს განცხადებით, ენმ-ს თავმჯდომარეს ნიკა მელიას სადეპუტატო მანდატი უნდა შეუჩერდეს და კანონი უნდა აღსრულდეს, სხვა შემთხვევაში ქვეყანაში მყოფი 400-მდე მსჯავრდებულისთვის, რომლებიც ასევე ატარებენ ელექტროსამაჯურს, რთული ასახსნელი იქნება, რატომ დაუშვეს გამონაკლისი პოლიტიკოსის მიმართ. სერგეენკოს თქმით, კანონის წინაშე ყველა თანაბარია და იმედს იტოვებს, რომ მელია კანონის შესაბამისად მოიქცევა:

"საბოლოოდ ჩამოვყალიბდით იმ პოზიციაზე, რომ შეჩერებული იქნება, რამ მიგვიყვანა აქამდე - რამდენიმე ფაქტორმა, კერძოდ, კანონი უნდა იყოს დაცული ნებისმიერ შემთხვევაში, თუნდაც ადამიანი თვლიდეს, რომ მის მიმართ უსართლოდ იყო გადაწყვეტილება მიღებული. კანონი უზენაესია და უნდა აღსრულდეს. მე სპეციალურად დავინტერესდი რამდენი ადამიანი ატარებს საქართველოში იგივე სამაჯურს სხვადასხვა მიზეზების გამო და ასეთი აღმოჩნდა 400-მდე ადამიანი, ძალიან რთული იქნება მათთვის ასახსნელად, რატომ მოვიქეცით ერთ შემთხვევაში პოლიტიკოსთან მიმართებაში სხვანაირად და არაპოლიტიკოსთან მიმართებაში სხვანაირად. მე მაინც იმედს ვიტოვებ, რომ გადაწყვეტილება იქნება პირველ რიგში ნიკა მელიასგან კანონმორჩილი და შესაბამისი ნაბიჯები იქნება გადადგმული" - განაცხადა სერგეენკომ.