"გირჩი - მეტი თავისუფლების" წევრი, ნიკა მოსიაშილი დალუქულ "ჯაფარას" ბართან მყოფ პოლიციელებს ტორტით გაუმასპინძლდა და იმედი აქვს, რომ "წითელგულებიანი ტორტით მაინც მოთაფლავს".

მოსიაშვილს პროტესტის მიუხედავად, არ აქვს იმედი რომ პოლიცია დალუქულ ობიექტს გახსნის.

"დღეს პატივცემულებთან მოვედი ხილის ტორტით, მოვედი იმიტომ, რომ ბარი, რომელიც ჩაგვიკეტეს და დაგვილუქეს იქ გვქონდა ტორტი. დღის განმავლობაში მოსული ვიყავი, მართლა ძალიან მინდოდა და არ შემიშვეს. მოგვიანებით ვჭამოთო ასე მითხრეს, მოვედი და იმედი მაქვს, რომ ახლა ესენიც შეჭამენ, ასე მაინც მოვთაფლო ეს ხალხი, სხვანაირად არ ჭრის არაფერი... წითელგულებიანი ტორტი მოვუტანე პატივცემულებს.

მე ვარღვევ ხოლმე კომენდანტს, ჩემთვის აღარ არსებობს. ერთხელ დავარღვიე 2000 ლარიანი ჯარიმა დამიწერეს, მერე გავაპროტესტე და დავარღვიე დემონტრაციულად პარლამენტის წინ... ახლა მოვედი ტორტი მოვიტანე, უკვე სისხლის სამართლის საქმეა და ტორტის გამო ხომ არ დამიჭერენ, სირცხვლია.

არ ვიცი, როდის მოგვცემენ ​ბარში შესვლას უფლებას. მგონი, სანამ კომენდანტის საათი არ დამთავრება, კორონა არ წავა და მზე დასავლეთიდან არ ამოვა, მანამდე ესენი ალბათ უფლებას არ მოგვცემენ... დავალება აქვთ ამათ და ამიტომ დგანან, ის, რაც თვითონვე დალუქეს, რომ სხვა ადამიანმა არ მოხსნას ლუქი", - ამბობს ნიკა მოსიაშილი Facebook-ის ლაივში.

შეგახსენებთ, რომ ბარი 13 თებერვალს "გირჩი-მეტი თავისუფლების" თავმჯდომარემ, ზურაბ ჯაფარიძემ დემონსტრაციულად გახსნა და ამ ფორმით პოლიტიკური დაუმორჩილებლობა გამოაცხადა. ჯაფარიძე იმავე ღამეს 2 ათასი ლარით დააჯარიმეს. ამის მიუხედავად, "ჯაფარასთან" მეორე დღესაც, 14 თებერვალს, იგივე დროს, 19 საათზე გაიხსნა. ამჯერად პოლიციამ ის დალუქა.