პატივია, იყო ადამიანი, რომელიც აშიშვლებს სისტემას

პატივია, იყო ადამიანი, რომელიც აშიშვლებს სისტემას - ნიკა მელიას ემოციური მიმართვა

პოლიტიკა - 18:01, 15 Feb, 2021

924

ნაციონალური მოძრაობის ლიდერი ნიკა მელია სერგეი გავრილოვის კომენტარს გამოეხმაურა და აღნიშნა, რომ მას სანერვიულო არაფერი აქვს, პირიქით - სიამაყით ევსება გული, რადგან მისთვის პატივია იმ რეჟიმის გაშიშვლება, რომელიც ივანიშვილის ხელისუფლებამ რუსეთის დავალებით შექმნა:

"ერთი საათის წინ რუსეთის დუმის დეპუტატის, ოკუპანტი სახელმწიფოს გამორჩეულად აგრესიული წარმომადგენლის ბატონ სერგეი გავრილოვის განცხადება გავრცელდა, რომელიც ბოლომდე მხარს უჭერს ქართულ ოცნებას და 2019 წლის 20 ივნისის ეროვნულ გამოსვლას სახელმწიფო გადატრიალებად აფასებს. ეს არის პირდაპირი დირექტივა ქართული ოცნებისთვის პოლიტიკური რეპრესიების გასაგრძელებლად, დემოკრატიული ოპოზიციის წარმომადგენლებისა და 20 ივნისს მონაწილეთა წინააღმდეგ და მათ დასასჯელად. ბევრი აქ, ალბათ, სალაპარაკო აღარ დარჩა, წილი ნაყარია, ხაზები გავლებულია, ყველაფერი ნათელია - ერთ მხარეს დგას ოკუპანტი გავრილოვი და მეორე მხარეს დგას შეუპოვარი ქართველი ხალხის პროტესტი და როდის, თუ არა ახლა, ყველა ქართული ოცნების დეპუტატმა თავის თავს უნდა ჰკითხოს, დაუსვას მნიშვნელოვანი კითხვა, რომელზეც პასუხის გაცემა მოუწევთ მრავალი წლის განმავლობაში - რომელ მხარეზე დგანან. დგანან გავრილოვების მხარეს თუ დგანან ანწუხელიძის, მერაბ კოსტავას, ჟიული შატრავას, ზვიად გამსახურდიას და ეროვნული ღირსების მხარეს.

ჩემზე ნუ იდარდებთ, ბატონო ქართული ოცნების დეპუტაციავ, მართლაც, თუ კი სადმე, ოდესმე სანერვიულო ცხოვრებაში არაფერი არ მქონია, აი სწორედ ახლა არ მაქვს, იმიტომ, რომ ღირსებაა, ნამდვილად, პატივია და, ალბათ, ბედისწერაც იყო ერთ-ერთი ის ადამიანი, რომელიც თავიდან ბოლომდე აშიშვლებს რეჟიმს, სისტემას, რომელიც ემსახურება გავრილოვს და მის ხელმძღვანელ პირებს ოკუპანტი სახელმწიფოს დედაქალაქში მოსკოვში. ვიმეორებ - პატივია და ყველა ნორმალური ადამიანს სიამაყით ევსება გული და ამ ყველაფერს ვგრძნობ ახლა მე. სანერვიულო არაფერი მაქვს, თუ კი ვეცდები და გადავიქცევი ალტრუისტ ადამიანად, თქვენზე კი ნამდვილად შეიძლება ადამიანმა ჩემს მდგომარეობაში იდარდოს, ამიტომ გადაწყვეტილება მიიღეთ თავად, ამის შემდეგ ჩემს მიერ მიღებული გადაწყვეტილება იქნება გაცხადებული. თავის დახრას არ ვაპირებ. ღმერთმა დამიფაროს, თავი შევადარო იმ ახალგაზრდებს, რომლებმაც 9 აპრილს თავი არ დაუხარეს რუსულ ნიჩბებს, მაგრამ სიცოცხლე დათმეს, შედეგად ჩვენ ყველანი აქ ვართ დამოუკიდებელ სახელმწიფოში, მაგრამ იმ ადამიანების თავდადებით და რა მოსატანია შიში, როდესაც შენი მოწინააღმდეგე ახლა არის გავრილოვი, კობახიძე, ჩინჩალაძე, მურუსიძე, ივანიშვილი. დიდი მადლობა მხარდაჭერისთვის, უზომოდ დიდ სოლიდარობას ვგრძნობ, ამისთვის ღირდა სიცოცხლე, ამისთვის ღირს ცხოვრება, გაუმარჯოს დამოუკიდებელ საქართველოს" - განაცხადა ნიკა მელიამ.