"2 თვე გაწელეს საქმე... ის ბიჭი სასწრაფოდ რომ დაეჭირათ, ჩემი შვილი ახლა ცოცხალი იქნებოდა" - ქობულეთში გარდაცვლილი 14 წლის გოგონას დედა სამართალდამცავებს უყურადღებობაში ადანაშაულებს

საზოგადოება - 15:48, 12 Feb, 2021

1921

გარდაცლილი 14 წლის გოგოს თურქეთიდან დაბრუნებული დედა სამართალდამცველებთან შეხვედრამდე მედიასთან პირველ კომენტარს აკეთებს და შვილის თვითმკვლელობის გარშემო არსებულ მძიმე გარემოებებს იხსენებს.

მისი თქმით, შვილზე განხორციელებული სექსუალური ძალადობის შესახებ მაშინ გაიგო, როდესაც 14 წლის მოზარდმა ამბის პოლიციისთვის შეტყობინება გადაწყვიტა - იმ დღიდან კი მისივე თქმით, მოზარდი უკიდურესად შევიწროვებული და ძალადობის მსხპერლი იყო ნათესავების მხრიდან.

გარდაცვლილის დედა ყვება, რომ 14 წლის ქალიშვილის მდგომარეობის შესახებ სრულად იყო ინფორმირებული სოციალური მუშაკიც, რომელმაც მძიმე ემოციური და ფიზიკური გარემოებების მიუხედავად, ფსიქოლოგის მეთვალყურეობა არ უზრუნველყო და სწორედ ამიტომ , სამართალდამცავი ორგანოების დაგვიანებულ მოქმედებას უკავშირებს არასრულწლოვანი ქალიშვილის მიერ სიცოცხლის თვითმკვლელობით დასრულებას.

"ჩემმა მამამთილმა გადაწყვიტა, რომ წავიდეს დედამისთან თურქეთშიო, აქ ვერ იცხოვრებს, სოფელში, შეგვარცხვინაო.

ნათესავებმა უმოწყალოდ სცემეს , ძლივს გამოართვეს ხელიდან - ბავშვი შემოგაკვდება და ციხეში ჩაჯდებიო .

2 თვე გაწელეს საქმე. ხომ შეიძლებოდა, რომ ეს ბიჭი სასწრაფოდ დაეჭირათ და ჩემი შვილი ჩემთან გამოეგზავნათ ჩემი შვილი ახლა ცოცხალი იქნებოდა".- აცხადებს გარდაცვლილის დედა "ფორმულასთან".

აქვე გეტყვით, რომ მოზარდის თვითმკვლელობის შემდეგ დააკავეს მასთან სექსუალური კავშირის დამყარებაში ბრალდებულიც - სავარაუდო დამნაშავის მიმართ გამოძიება ამ დრომდე "16 წლის ასაკს მიუღწეველის სხეულში სექსუალური ხასიათის შეღწევის" ბრალდებით მიმდინარეობს, რაც 7-დან 9 წლამდე პატიმრობას ითვალისწინებს.

შეგახსენებთ, რომ ქობულეთში მცხოვრებმა 14 წლის გოგონამ სიცოცხლე თვითმკვლელობით 10 თებერვალს დაასრულა.