საპარლამენტო უმრავლესობის დეპუტატი დიმიტრი ხუნდაძე "რესპუბლიკური პარტიის" ლიდერების გადაწყვეტილებას ეხმაურება და აცხადებს, რომ კარგია, თუ მათ პარლამენტში შესვლის სურვილი გაუჩნდა, თუმცა მისი თქმით, საკანონმდებლო ორგანო ერთჯერადი მოხმარების არ არის. ხუნდაძის შეფასებით, თუ რომელიმე პარტია პარლამენტში მხოლოდ კონკრეტული საკითხის გამსახილველად შედის, ე.ი. მათ მხოლოდ საკუთარი პოლიტიკური ბედი აინტერესებთ:

“თუ პარლამენტში მხოლოდ საარჩევნო სისტემის განხილვისთვის შემოდიან, ე.ი. მათ მხოლოდ საკუთარი პოლიტიკური ინტერესები და საკუთარი ბედი აინტერესებთ და არა ძალიან ბევრი საკითხი ქვეყნისა და საზოგადოების წინაშე. სასურველი და აუცილებელია, ოპოზიცია ასეთი საკითხების განხილვას ესწრებოდეს.

ჩვენ განვაცხადეთ, რომ საარჩევნო თემატიკის განხილვისათვის "ქართული ოცნება" არის მზად ნულიდან სამ პროცენტამდე ბარიერის განხილვის კონტექსტში. ამ დიაპაზონში ვიმუშავებთ ოპოზიციის იმ წარმომადგენლებთან, ვინც პარლამენტში შემოვა და გადაწყვეტილება იქნება მათთან ერთად განხილული. მხოლოდ საარჩევნო თემატიკა არ არის ქვეყნის წინაშე მდგარი საკითხი, ძალიან ბევრი საკითხია, რომელიც პარლამენტში ერთობლივად უნდა გადაწყდეს”, - განაცხადა ხუნდაძემ.

შეგახსენებთ, რომ მას შემდეგ, რაც მამუკა მდინარაძემ განაცხადა, რომ მმართველი პარტია მზადაა, განიხილოს უბარიერო საარჩევნო სისტემა ოპონენტებთან ერთად, ხათუნა სამნიძემ დ თამარ კორძაიამ გამოთქვეს მზაობა კანონიზე მსჯელობის მიზნით ერთჯერადად შევიდნენ პარლამენტში, რასაც მოგვიანებით მდინარაძემ ბავშური თამაში უწოდა. ამის შემდეგ კორძაიამ განაცხადა, რომ მსგავსი განცხადებების კეთების გამო გამოიკვეთა ოცნების მიდგომა ოპოზიციური პარტიების მიმართ, რის გამოც "რესპუბლიკელებმა" გადაწყვეტილება შეცვალეს.