საპარლამენტო უმრავლესობის წევრი დავით სერგეენკო "რესპუბლიკური პარტიის" ლიდერების გადაწყვეტილებას წინგადადგმულ ნაბიჯად აფასებს, თუმცა, აქვე დასძენს, რომ მათი მოსაზრება ოპტიმალური არ არის. მისი თქმით, ქვეყნისთვის მნიშვნელოვანი საკითხებისადმი სელექციური მიდგომა დაუშვებელია:

“იმ საკითხებს, რაც შენ ქვეყანას ეხება, არ შეიძლება, რომ სელექციურად მოეკიდო - რომელია შენთვის კომფორტული და რომელი - არა. ასეთი სელექცია არ იქნება სწორი, თუ შემოდიან, შემოვიდნენ.

მდინარის გადაღმა გადაძახილ-გადმოძახილი არ მგონია სერიოზული. ნუ დაირქმევენ, რომ შემოდიან პარლამენტში, მაგრამ ხომ შეიძლება რაღაც გამჭვირვალე შეკრება, სადაც მსჯელობა იქნება ამაზე. შეთვლა-შემოთვლით ქვეყანა ვერ წავა წინ”,- აღნიშნა სერგეენკომ.

შეგახსენებთ, რომ მას შემდეგ, რაც მამუკა მდინარაძემ განაცხადა, რომ მმართველი პარტია მზადაა, განიხილოს უბარიერო საარჩევნო სისტემა ოპონენტებთან ერთად, ხათუნა სამნიძემ დ თამარ კორძაიამ გამოთქვეს მზაობა კანონიზე მსჯელობის მიზნით ერთჯერადად შევიდნენ პარლამენტში, რასაც მოგვიანებით მდინარაძემ ბავშური თამაში უწოდა. ამის შემდეგ კორძაიამ განაცხადა, რომ მსგავსი განცხადებების კეთების გამო გამოიკვეთა ოცნების მიდგომა ოპოზიციური პარტიების მიმართ, რის გამოც "რესპუბლიკელებმა" გადაწყვეტილება შეცვალეს.