უნდა დავრწმუნდეთ, რომ შავ ზღვაში არ იყოს მხოლოდ ერთი ქვეყნის, რუსეთის დომინანტობა - იენს სტოლტენბერგის ღია მხარდაჭერა საქართველოს

პოლიტიკა - 13:45, 10 Feb, 2021

1061

ჩრდილო ატლანტიკური ალიანსის კარი ღიაა საქართველოსთვის - ამის შესახებ ნატოს გენერალურმა მდივანმა იენს სტოლტენბერგმა უკრაინის პრემიერ-მინისტრთან, დენის შმიგალთან ერთობლივ პრესკონფერენციაზე ისაუბრა.

მისი თქმით, შავი ზღვა ნატო-სთვის სტრატეგიული მნიშვნელობისაა.

„ჩვენ უნდა გავაცნობიეროთ, რომ შავი ზღვა ნატო-სა და ნატო-ს მოკავშირეებისთვის, ასევე ჩვენი ზღვისპირა წევრებისთვის თურქეთისთვის, ბულგარეთის, რუმინეთისთვის სტრატეგიულ მნიშვნელობისაა და ამ რეგიონში გვყავს ორი ახლო და ძალიან ღირებული პარტნიორი, უკრაინა და საქართველო. ამავე დროს, ჩვენ ვხედავთ შავ ზღვაზე რუსეთის მნიშვნელოვან გაძლიერებას, რაც გამომდინარეობს ყირიმის უკანონო ანექსიიდან და ასევე მიმდინარე წელს რუსეთის საზღვაო ძალების რაოდენობის გაზრდით. ნატო აძლიერებს საქართველოსა და უკრაინის მხარდაჭერას, მათ შორის, მათი საზღვაო ძალების დახმარებით. ჩვენ უნდა დავრწმუნდეთ, რომ შავ ზღვაში არ იყოს მხოლოდ ერთი ქვეყნის, კერძოდ, რუსეთის დომინანტობა“.- განაცხადა სტოლტენბერგმა.

დენის შმიგალის თქმით კი უკრაინას ნატო-ს წევრობის სამოქმედო გეგმის მიღება საქართველოსთან ერთად სურს.

"ჩვენ გვინდა, არ ჩამოვრჩეთ საქართველოს და მივიღოთ საქართველოსთან ერთად მაპ-ი და ამაზე აქტიურად ვმუშაობთ. მიმაჩნია, რომ ჩვენი შეხვედრა არის საკმაოდ პოზიტიური და მნიშვნელოვანი სიმბოლური გზავნილი და იმედისმომცემი".- განაცხადა უკრაინის პრემიერმა.