საქართველოს ტერიტორიული მთლიანობსა და ოკუპანტების მიერ საქართველოს მოქალაქეების გატაცების ფაქტი დღეს ევროსაბჭოს საპარლამენტო ასამბლეის ერთ-ერთი თემა გალხდათ. ევროპის საპარლამენტო ასამბლეის თანამომხსენებლებმა საქართველოს მონიტორინგის საკითხებში, ტიტუს კორლატეანმა და კლოდ კერნმა ღრმა შეშფოთება გამოხატეს ე.წ. ცხინვალის სასამართლოს მიერ ზაზა გახელაძისთვის 12 წლიანი პატიმრობის შეფარდებით:

„ეს არის უკანონო სასამართლოს მიერ გამოტანილი უკანონო განაჩენი. ჩვენ ბატონი გახელაძის დაუყოვნებლივი გათავისუფლებისკენ მოვუწოდებთ. ამ მხრივ, გვინდა, ხაზი გავუსვათ რუსეთის, როგორც საქართველოს სამხრეთ ოსეთის რეგიონზე კონტროლის მქონე ქვეყნის, პასუხისმგებლობას, როგორც ეს ადამიანის უფლებების ევროპული სასამართლოს 2021 წლის 21 იანვრის განჩინებაშია აღნიშნული,“- ნათქვამია ევროსაბჭოს საპარლამენტო ასამბლეის საქართველოს მონიტორინგის ჯგუფის თანამომხსენებლების მიერ გავრცელებულ განცხადებაში.

კორლატეანი და კერნი კიდევ ერთხელ უცხადებენ სრულ მხარდაჭერას საქართველოს ტერიტორიულ მთლიანობასა და სუვერენიტეტს.

შეგახსენებთ, რომ ოკუპირებული ცხინვალის ე.წ. სასამართლომ კასპის მუნიციპალიტეტის სოფელ ქვემო ჭალაში მცხოვრებ ზაზა გახელაძეს, რომელიც ოკუპანტებმა ივლისის თვეში გაიტაცეს, 12 წლითა და 6 თვით თავისუფლების აღკვეთა მიუსაჯა.