"სამართლიანი არჩევნების" იურისტმა ნინო რიჟამაძემ საარჩევნო რეფორმასთან დაკავშირებული სამუშაო ჯგუფის პირველი შეხვედრის დასრულების შემდეგ ჟურნალისტებთან გააკეთა კომენტარი და განაცხადა, რომ დოკუმენტში ცვლილებები ეხებოდა ისეთ საკითხებს, როგორიცაა საარჩევნო დავები, ელექტრონული ტექნოლოგიებით ხმის მიცემა, საარჩევნო ადმინისტრაციის დაკომპლექტება და სხვა საკითხები:

"ვფიქრობ, რომ დოკუმენტთან და იმ საკითხებთან დაკავშირებით, რომელიც შემოთავაზებულია ამ დოკუმენტით "სამართლიანი არჩევნები" წლებია მუშაობს და აქვს შესაბამისი რეკომენდაცია საარჩევნო ადმინისტრაციის დაკომპლექტებაზე და განსაკუთრებით, ქვედა დონეზე საუბნო საარჩევნო კომისიების დაკომპლექტების საკითხთან დაკავშირებით საარჩევნო დავების უფრო ეფექტურად განხილვის ნაწილში და სხვა საკითხებთან, მათ შორის, ელექტრონული ხმის მიცემის წესებთან დაკავშირებით. ამ საკითხებთან მიმართებით დეტალურ, წერილობით მოსაზრებებს ჩვენ წარმოვადგენთ უკვე ამ დოკუმენტის სიღრმისეულად შესწავლით და გაანალიზების შემდგომ. ვფიქრობთ, რომ არსებობს საკითხები, რომელიც ასევე საჭიროებს რეფორმას და საკანონმდებლო ცვლილებებს, მაგალითად, ამომრჩევლის მოსყიდვასთან დაკავშირებით, რომელსაც არ ეხება აღნიშნული დოკუმენტი. ძირითადი საკითხები,რომელსაც არ ითვალისიწინებს წარმოდგენილი დოკუმენტი, ეს არის ამომრჩევლის მოსყიდვასთან დაკავშირებული საკითხი, ასევე არ არის დეტალური ცვლილებების ხედვა, მაგალითად, ადმინისტრაციული რესურსის გამოყენების და წინაასაარჩევნო კამპანიაში საჯარო მოხელეების ჩართულობასთან დაკავშირებით. ვფიქრობთ, რომ ამ საკითხების რეგულირებაც და დეტალური სამართლებრივი მოწესრიგება მნიშვნელოვანია", - განაცხადა რიჟამაძემ.

შეგახსენებთ, რომ პარლამენტში საარჩევნო რეფორმასთან დაკავშირებული კანონპროექტი პარლამენტს 2021 წლის 1-ელ მარტამდე წარედგინება, ხოლო კანონპროექტი მიღებული იქნება არაუგვიანეს 2021 წლია 1-ელი მაისისა.