"40 წელი ბრძოლა საქართველოსთვის" - დღეს, ეროვნულ-დემოკრატიული პარტიის ძველი და ახალი თაობის წარმომადგენლები პარტიის აღდგენის თარიღს აღნიშნავენ

პოლიტიკა - 03:28, 08 Feb, 2021

1522

8 თებერვალს, 4 ათეული წლის წინ, ეროვნულ განმათავისუფლბლი მოძრაობის ლიდერმა, გიორგი ჭანტურიამ რამდენიმე მის თანამოაზრესთან ერთად, საბჭოთა იმპერიის პირობებში, იატაკქვეშეთში აღადგინა ილია ჭავჭავაძის იდეებსა და პროგრამაზე აღმოცენებული ეროვნულ-დემოკრატიული პარტია.

როგორც ცნობილია, იმდროინდელი კანონების მიხედვით, საბჭოთა იმპერიის წინააღმდეგ ორგანიზებული მოქმედება, უმაღლეს სასჯელს ითვალისწინებდა. მიუხედავად ამისა, ილიას იდეურმა მემკვიდრეობამ და 1917 წელს სპირიდონ კედიას თავმჯდომარეობით ოფიციალურად დაფუძნებულმა ეროვნულ-დემოკტრატიულმა პარტიამ, 1981 წელს ახალი სიცოცხლე შეიძინა.

პარტიის აღდგენის უმთავრესი მიზანი ქართული სახელმწიფოებრიობის იდეა იყო. ამ იდეისთვის ბრძოლას შეეწირა გიორგი ჭანტურია.

პარტიის დაფუძნების თარიღთან დაკავშირებით, ეროვნულ-დემოკრატიული პარტიის ძველი და ახალი თაობის წარმომადგენლები, საგანგებოდ შეიკრიბებიან გიორგი ჭანტურიას საფლავთან. როგორც „ნიუპოსტისთვის“ გახდა ცნობილი, ედპ-ის ოფისში პერიოდულად გაიმართება ძველი და ახალი ეროვნულ-დემოკრატების შეხვედრები, რომლის მიზანიც არის თანამედროვე ქართულ პოლიტიკაში ეროვნული რესურსის თავმოყრა, ჩართულობის გაზრდა და მათი გამოცდილების გაზიარება.

"40 წელი ბრძოლა სამშობლოსათვის..! საქართველოს ისტორიაში იყო და დღესაც არის პერიოდი, როცა ჩვენი სახელმწიფოებრიობა ჩვენგან სერიოზულ ძალისხმევას მოითხოვს, ეს ძალისხმევა კი დღეს ეროვნული ძალების თავმოყრაში გამოიხატება. ჩვენი საქმე ეროვნული მოძრაობით არ დასრულებულა, არამედ დღესაც გრძელდება. პერიფრაზს გავაკეთებ ცნობილი სიტყვების: ჩვენ ვიქნებით ყველგან და ხელს შევუწყობთ იქ, სადაც ქართული საქმე კეთდება და ხელს შევუშლით, ყველგან, სადაც ეს საქმე ფუჭდება!" - წერს ფეისბუქის გვერდზე ედპ-ის თავმჯდომარე ბაჩუკი ქარდავა.