სნაიპერული შაშხანა, ცეცხლსასროლი იარაღი, ხელკეტები და ბეისბოლის ჯოხი - ეს ყველაფერი პოლიციამ იმ ავტომანქანებიდან ამოიღო, რომლითაც ნამახვანჰესის აქციაზე დასასწრებად, თბილისიდან აქტივისტები ჩავიდნენ.

ერთ-ერთ მანქანაში, სადაც იარაღი და "დუბინკები" აღმოჩნდა, "ლეიბორისტული პარტიის" წევრი ლაშა ჩხარტიშვილი იმყოფებოდა.

ჩხარტიშვილი აცხადებს, რომ აქციის ერთ-ერთ მონაწილეს ჰქონდა სანადირო თოფი, რაც არ არის კანონდარღვევა.

"ივანიშვილის რეჟიმი, ნამახვანის ჰესის მეშვეობით გვიტბორავს სამშობლოს. ეს არის ჩემთვის მთავარი და რაც შეეხება პოლიციის მხრიდან სხვადასხვა ტიპის ხელოვნური შეფერხებების საკითხს, ამაზე მათ უნდა დაელაპარაკოთ. მე არანაირი იარაღი არ მქონია, აქციის ერთ-ერთ მონაწილეს ჰქონდა სანადირო თოფი, რაც არ არის კანონდარღვევა,"- აცხადებს "ლეიბორისტული" პარტიის უფლებადაცვითი ცენტრის ხელმძღვანელი ლაშა ჩხარტიშვილი.

ერთ-ერთი აქტივისტი, ვარლამ გოლეთიანი ფიქრობს, რომ ეს ყველაფერი დისკრედიტაციისთვის სჭირდებათ, რომ შექმნან საზოგადოებაში აზრი, თიქთის, მოძალადე ხალხი იკრიბება.

"ვფიქრობ, დისკრედიტაციისთვის სჭირდებათ, თითქოს აქ მოძალადე ხალხი იკრიბება. ფაქტები სხვა რამეს აჩვენებს, ჩვენ მშვიდობიანად ვიკრიბებით ყოველდღიურად, მათ თავისუფლად შეუძლიათ და პროცესს ვერავინ გააკონტროლებს ჩვენგან, ვინ რა იარაღს სად ამოიღებს. საორგანიზაციო ჯგუფი ვემიჯნებით და ვამბობთ, რომ ყველა აქცია იქნება მშვიდობიანი,"- აცხადება ვარლამ გოლეთიანი.