"თავისუფლება ზაზა გახელაძეს" - საპროტესტო აქცია გატაცებულის მშობლიურ სოფელში, ჭალაში.

არასამთავრობო ორგანიზაციები ოკუპანტების ტყვეობაში მყოფ საქართველოს მოქალაქეს და მის ოჯახს სოლიდარობას უცხადებენ. ისინი საერთაშორისო საზოგადოებას ქმედითი ნაბიჯების გადადგმისკენ მოუწოდებენ.

"შევეცდებით, რომ ჩვენს ირგვლივ გავაერთიანოთ სხვა არასამთავრობო ორგანიზაციები, მაქსიმალურად გამოვიყენოთ ჩვენ ხელთ არსებული ბერკეტები. საზოგადოებაც შემოგვიერთდება, იმიტომ, რომ ეს არ არის მხოლოდ ერთი ოჯახის პრობლემა, საქართველოს პრობლემაა და ყველა უნდა გავერთიანდეთ,"- აცხადებს აქციის მონაწილე.

აქტივისტების თქმით, ცეცხლის შეწყვეტის ხელშეკრულება რუსეთს რომ შეესრულებინა, ახლა ეს არ მოხდებოდა და ეს შედეგები არ იქნებოდა.

"2008 წელს, ცეცხლის შეწყვეტის ხელშეკრულება რუსეთს რომ შეესრულებინა, ახლა ეს არ მოხდებოდა და ეს შედეგები არ იქნებოდა. საქართველოს მთავრობას მოვუწოდებთ, არ შემოიფარგლონ მხოლოდ სიტყვიერი მოწოდებებით და ქმედითი ნაბიჯები გაატარონ რუსეთის ფედერაციასთან. საერთაშორისო დონეზე უნდა მოვითხოვოთ მხარდაჭერა, ეს არ არის პირველი და არც ბოლო შემთხვევა იქნება თუ ასე გაგრძელდა,"- აცხადებს აქციის ერთ-ერთი მონაწილე.

ცნობისთვის, ტყვეობის მორიგი ფაქტი საქართველოს მეგობარმა ქვეყნებმა ერთხმად დაგმეს, საკითხზე მუშაობის გააქტიურება პრემიერ-მინისტრმა შესაბამის უწყებებს უკვე დაავალა.