"ნაციონალური მოძრაობის" წევრმა გიორგი ბარამიძემ, რომელიც რუსთაველზე დაუმორჩილებლობის მარშს შეუერთდა, განაცხადა, რომ დაწესებული შეზღუდვები პოლიტიკურ მოტივს ატარებს და პანდემია უბრალოდ საბაბია. მისი თქმით, ხელისუფლებამ 10 მილიარდამდე თანხა შეჭამა და აქედან პანდემიასთან ბრძოლისთვის არაფერი გაკეთებულა:

"სოციალურ-ეკონომიკური თვალსაზრით ქვეყანაში უმძიმესი მდგომრეობაა. ხელისუფლებამ, მას შემდეგ რაც არჩევნები გააყალბა და მოახდინა ხელისუფლების უზურპაცია, ცდილობს პანდემია საბაბად გამოიყენოს, იმისათვის, რომ ქვეყანა ჩაკეტოს და არ განვითარდეს ის საპროტესტო მოვლენები, რომელიც მიმართულია რეჟიმის წინააღმდეგ. ამ პანდემიის პირობებში 10 მილიარდამდე თანხა შეიჭამა, არაფერი გაკეთდა რის გაკეთებაც შეიძლებოდა პანდემიის შესარბილებლად. ქვეყანაში შემოღებულია ისეთი შეზღუდვები, რომელიც იმაზე მკაცრია, ვიდრე ჩვენზე ბევრად უფრო მდიდარ სახელმწიფოებშია, ამიტომ,ნათელია,რომ ეს შეზღუფვები პოლიტიკური ხასიათისაა და სოლიდარული ვარ ყველა იმ ადამიანის, ვინც ითხოვს ამ შეზღუდვების მოხსნას. ყველა შეზღუდვაზე არაა ლაპარაკი, უნდა ვატაროთ ნიღაბი და დავიცვათ ჩვენი და ჩვენი თანამოქალაქეების ჯანმრთელობა, მაგრამ ეს რეგულაციები, რომელიც აბსოლუტურად ხელოვნურია, ანგრევს ეკონომიკას და ადამიანები შიმშილის პირობებში არიან. ეს ვითარება უნდა დამთავრდეს და გაიხსნას ქვეყანა, გაიხსნას ხელოვნურად ჩაკეტილი სახელმწიფო", - განაცხადა ბარამიძემ.