საოკუპაციო რეჟიმის მიერ ზაზა გახელაძის უკანონო ატიმრობას საქართველოში ამერიკის ელჩი კელი დეგნანი ეხმაურება და აცხადებს, რომ აშშ გმობს საქართველოს მოქალაქის წინააღმდეგ გუშინ მიღებულ ზომას.

დეგნანი გამოთქვამს იმედს, რომ საკითხს სერიოზულად განიხილავენ და დაუყონებლივ გაათავისუფლებენ საოკუპაციო რეჟიმის უკანონო ტყვეს:

„აშშ გამოთქვამს ძლიერ შეშფოთებას და გმობს უკანონოდ დაპატიმრებული საქართველოს მოქალაქის წინააღმდეგ გუშინ მიღებულ ზომას. იგი გასული წლის ივლისიდან მოყოლებული იმყოფება პატიმრობაში და მას წაყენებული აქვს სრულიად უსაფუძვლო, შეთითხნილი ბრალდებები, რამდენადაც ჩვენთვის არის ცნობილი. გამოვთქვამთ იმედს, რომ სერიოზულად იქნება განხილული ამ სიტუაციის დაუყოვნებლივ გადაჭრის და საქართველოს მოქალაქის მაქსიმალურად დროულად გათავისუფლების საკითხი", - განაცხადა კელი დეგნანმა.

შეგახსენებთ, რომ ოკუპირებული ცხინვალის ე.წ. უზენაესმა სასამართლომ საქართველოს მოქალაქეს ზაზა გახელაძეს 12 წლით და 6 თვით თავისუფლების აღკვეთა მიუსაჯა. გახელაძე დამნაშავედ რუსეთის სისხლის სამართლის კოდექსის 317-ე მუხლით (სამართალდამცავი ორგანოს თანამშრომლის სიცოცხლის ხელყოფა) და 322-ე მუხლით (სახელმწიფო საზღვრის უკანონოდ გადაკვეთა) ცნეს.