ოპოზიცია ევროპარლამენტის გზავნისლს წულუკიანის ქმედებასთან დაკავშირებით უმკაცრეს გაფრთხილებად აფასებს. როგორც ხელისუფლების ოპონენტები აღნიშნავენ, წულუკიანმა ის ზღვარი გადაკვეთა, რაც ცივილიზებული სამყაროსთვის მიუღებელია:

"ეს იყო უმკაცრესი გაფრთხილება, რომლის მსგავსიც ბოლო 8 წლის განმავლობაში არ მახსენდება. მორალურ ფსკერზე მყოფმა "ოცნების" წევრმა საზოგადოებას დამოუკიდებელი მედიის მიმართ ძალადობისკენ მოუწოდა , რაც მიუღებელია", - განაცხადა ენმ-ს წევრმა ნონა მამულაშვილმა.

"ევროპარლამენტმა ადგილი მიუჩინა თეა წულუკიანს და "ქართულ ოცნებას", მკაცრად უთხრა, რომ არსებობს წითელი ზღვარი, რომლის გადაკვეთაც არ შეიძლება. ფაქტობრივად, შემოულაწუნეს ამ წერილით, უთხრეს, რომ ყველაფერი არ მოსულა", - აღნიშნა "სტრატეგია აღმაშენებლის" წევრმა სერგო ჩიხლაძემ.

შეგახსენებთ, რომ ევროპარლამენტერებმა საქართველოს პარლამენტის თავმჯდომარეს არჩილ თალაკვაძეს წულუკიანის მხრიდან ნიკა გვარამიას ნომრის გაჟღერებასთან დაკავშირებით წერილი გამოუგზავნეს, სადაც იუსტიციის ყოფილი მინისტრის საქციელი უსიამოვნოდ და არაეთიკურად შეაფასეს, რომელმაც პირადი ცხოვრების ფუნდამენტური უფლება დაარღვია. წერილში ევროდეპუტატები თალაკვაძეს პარლამენტის თავმჯდომარის ფუნქციას ახსენებენ და მოუწოდებენ, რომ საკანონმდებლო ორგანოში წესიერების მაღალი ხარისხი დაამყაროს.