ენმ-ს თავმჯდომარე ნიკა მელია სოციალურ ქსელში ხელისუფლებას მიმართავს და გირაოს თანხის ამოღებასთან დაკავშირებით რჩევას სთავაზობს. მელიას პოსტს უცვლელად გთავაზობთ:

"მივმართავ „ქართული ოცნებას“ - ერთადერთი გამოსავალი გაქვთ. თქვენ თვითონ, ცხადია, ვერ მიაგნებთ, ამიტომ ისევ მე გეტყვით :

იმედის ეთერში ტელემარათონი გამართეთ - „ნიკა მელიას გირაოს თანხის ასაგროვებლად“

სხვა გამოსავალი მართლა არ გაქვთ, წინააღმდეგ შემთხვევაში უნდა აღიაროთ რომ ბოლომდე უსუსურები ხართ!

პ.ს. მარათონის დასაქოქად პირველი შენატანები ოცნების დეპუტატებმა შეიტანონ, ლაშა ნაცვლიშვილსაც გააგებინეთ, ეგ თუ არა, მასში არსებული ბიძინა მაინც გაიღებს თანხას" - წერს მელია ფეისბუკის პირად გვერდზე.

შეგახსენებთ, რომ დღეს მთავარმა პროკურატურამ ნიკა მელია სასამართლოს მიერ დაწესებული გირაოს გადაუხდელობის გამო დაიბარა. საქმე ეხება 31 არჩევნების მომდევნო დღეს გამართულ აქციაზე სასამართლოს განჩინების საფუძველზე დაკისრებული ელექტრონული მონიტორინგისთვის განკუთვნილი სამაჯურის მოხსნას, რომლის გამოც სასამართლომ გირაოს სახით 40 ათასი ლარის გადახდა დააკისრა. მელიამ კი დღეს სპეციალურ ბრიფინგზე განაცხადა, რომ თანხის გადახდას არ აპირებს, რადგან ის ყველას წინაშე მართალია და უსამართლობასთან ბრძოლა უწევს, რომელშიც აუცილებლად გაიმარჯვებს.