„ქართული ოცნების“ დეპუტატი გივი მიქანაძე ოპოზიციასთან კონულტაციებს ადასტურებს. თუმცა კითხვაზე, კონკრეტულად ვისთან მიმდინარეობს კომუნიკაცია, დეპუტატმა თქვა, რომ თემა სენსიტიურია და ამის დაკონკრეტება არასწორი იქნება.

"ჩვენ, გარკვეული პერიოდის განმავლობაში გვქონდა და გვაქვს კონსულტაციები სხვადასხვა ოპოზიციური პარტიის წარმომადგენლებთან - ჩვენი განცხადება, რომ 20-მდე დეპუტატს აქვს პარლამენტში შესვლის სურვილი, მაგრამ ბულინგის წნეხს ვერ სცილდება, ზუსტად ამ კომუნიკაციის და კონსულტაციების შედეგიც არის"- ამბობს ის.

მისივე თქმით, ოპოზიციასთან კონსულტაციების მიზანია მოხდეს მოქალაქეების მიერ გაკეთებული არჩევანის პატივისცემა.

"იმ მოქალაქეების მიმართ ვართ პასუხისმგებლიანი, რომელთაც „ქართულ ოცნებას“ არ დაუჭირეს მხარი, მაგრამ ჩვენ გვინდა, საქართველოს საზოგადოების მიერ გამოხატული თავისუფალი ნება საბოლოო ჯამში ასახული იყოს პარლამენტში. თუ ვხედავთ, რომ ჯანსაღად მოაზროვნე რომელიმე ოპოზიციური პარტიის წარმომადგენელს ჩვენთან კომუნიკაცია და გარკვეული საკითხების განხილვა სურს, ჩვენ ყოველთვის გვაქვს ამისი მზაობა და ეს არასდროს დაგვიმალავს", - განუცხადა ჟურნალისტებს გივი მიქანაძემ.