გენერალი, სახელმწიფო დაცვის სპეციალური სამსახურის ყოფილი უფროსი, პრეზიდენტის ადმინისტრაციის ყოფილი ხელმძღვანელი თემურ ჯანაშია ამბობს, რომ არ აპირებს დეკლარაციის შევსებას, რადგან , მისივე თქმით, შევსების შემთხვევაში გამოვა, რომ გაოვიდა ბოიკოტის რეჟიმიდან და აყვა "ოცნების" თამაშს.

მისი თქმით, პარლამენტში შესვლა იმისთვის არ სჭირდებოდა, რომ იმუნიტეტი მიეღო, არამედ იმისთვის, რომ იქამდე ამომრჩევლის წუხილი მიეტანა და ქვეყნის განვითარებისთვის ხელი შეეწყო.

"რომ შევავსო, გამოდის, რომ გამოვედი ბოიკოტის რეჟიმიდან და ავყევი მათ თამაშს... პარლამენტში ახლა რაც ხდება, ამას მე "სახლობანას" თამაშს დავარქმევდი, ზოგმა ოპოზიციის სახელი დაირქვა, ზოგმა პოზიციის... რა თქმა უნდა, არასერიოზული იქნება მათი საგამოძიებო კომისიის მუშაობა, მათი საარჩევნო კოდექსი - ამაზე არც ღირს მაყურებლის ყურადღების გამახვილება.

მე პარლამენტში შესვლა იმისთვის არ მჭირდებოდა, რომ იმუნიტეტი მიმეღო, არამედ იმისთვის, რომ იქამდე ჩვენი ამომრჩევლის წუხილი მიმეტანა და ქვეყნის განვითარებისთვის ხელი შემეწყო... ჩემს წინააღმდეგ დაწყებული "პიჯაკების საქმე" ერთადერთი არ არის, რამდენიმე საქმე კიდევ იყო წამოწყებული, რომელიც ვერ მივიდა სასამართლომდე. ამის მიუხედავად, მე უარი ვთქვი მანდატზე და იმუნიტეტზე, რადგან არჩევნები გაყალბდა", - აღნიშნა თემურ ჯანაშიამ "დღის სტუმარში".

თემურ ჯანაშიამ პარლამენტიდან 4 თებერვალს მიიღო შეტყობინება, რომელიც მას, როგორც პარლამენტის დეპუტატს, დეკლარაციის შევსებას ავალდებულებს. აქვე გეტყვით, რომ დადგენილ ვადაში დეკლარაციის შეუვსებლობა სისხლის სამართლებრივ პასუხისმგებლობას ითვალისწინებს.

ცნობისთვის, საქართველოს მესამე პრეზიდენტის მიხეილ სააკაშვილის დაცვისა და სახელმწიფო დაცვის სპეციალური სამსახურის ყოფილ უფროსს, გენერალ თემურ ჯანაშიას ბრალი საბიუჯეტო თანხების ჯგუფურად გაფლანგვისთვის აქვთ წარდგენილი.