ოკუპირებულ აფხაზეთში 19 წლის ბიჭმა მეზობელი, 12 წლის გოგონა ოჯახის შექმნის მიზნით გაიტაცა. ორდღიანი ძებნის შემდეგ ე.წ. მილიციამ გატაცებული ალექსანდრა გვარამია ქალაქის მიტოვებული ქარხნის ტერიტორიაზე იპოვნეს.

გამტაცებელი ოჩამჩირელი ინალ გამახარიაა. არსებული ინფორმაციით, მას ფსიქიკური პრობლემები აქვს და ეს გენეტიკური ფაქტორია, რადგან იგივე დიაგნოზი მის მამასაც დაუსვეს თავის დროზე, თუმცა, ოჯახს ბიჭის სამკურნალოდ ფინანსური რესურსი არ გააჩნია. ინტერნეტში იმასაც წერენ, რომ ახალგაზრდა მამაკაცი ალკოჰოლზე დამოკიდებულია, პერიოდულად კი, აფექტურ მდგომარეობაში მყოფს მეზობლებიც ერიდებიან.

რაც შეეხება გოგონას, ადგილობრივების განცხადებით, ის ერთ-ერთი დეპუტატის ახლო ნათესავია, რომელმაც გატაცებულის მოსაძებნად ყველაფერი იღონა და სამი რაიონის მილიცია ჩარია საქმეში. ბიჭს ახლა პატიმრობა ემუქრება.