სახელისუფლებო გუნდის წევრის შალვა პაპუაშვილის განცხადებით, "ქართული ოცნება" საარჩევნო რეფორმაზე იწყებს მუშაობას, რომელიც ასევე მოიცავს ცესკოს თავმჯდომარის, ცენტრალური, საოლქო და საუბნო კომისიების შემადგენლობის ცვლილებას.

როგორც პაპუაშვილი განმარტავს, გადაისინჯება აგრეთვე საარჩევნო დავების განხილვასთან დაკავშირებული ნორმები და თუ ოპოზიციონერი დეპუტატების გარკვეული რაოდენობა პარლამენტში შესვლას დათანხმდება, მმართველი პარტია მზადაა, საარჩევნო ბარიერის 0-3%-მდე ფარგლებში დაწევა განიხილოს:

"საქართველოს დიდ ქალაქებში თვითმმართველობის არჩევნები ჩატარდება 4:1 თანაფარდობით პროპორციულ და მაჟორიტარულ საარჩევნო სისტემებს შორის. სხვა მუნიციპალიტეტებში თანაფარდობა განისაზღვრება ინდივიდუალურად არანაკლებ 2:1 თანაფარდობით პროპორციული სისტემის სასარგებლოდ. რაც განსაკუთრებით მნიშვნელოვანია დაინერგება ელექტრონული ტექნოლოგიები, რაც გამორიცხავს როგორც ყოველგვარ მანიპულაციას, ისე ადამიანურ შეცდომას და სამუდამოდ აღმოფხვრის დაუბალანსებელი ოქმების 30 წლიან პრობლემას. გარდა ამისა, მზად ვართ, განვიხილოთ საარჩევნო ბარიერის დაწევა 0-3%-მდე ფარგლებში, თუ პარლამენტში შემოვა დეპუტატების ის რაოდენობა, რომელიც საჭიროა საკონსტიტუციო რეფორმის განსახორციელებლად," - განაცხადა შალვა პაპუაშვილმა.