"ოცნების" მესიჯ-ბოქსი: მდინარაძე ისევ "ოპოზიციის შიგნით ბულინგზე" საუბრობს - "იქ არავის აქვს თავი, შემოვიდეს და კომისიის მუშაობაში ჩაერთოს"

პოლიტიკა - 16:44, 03 Feb, 2021

1128

ფრაქცია „ქართული ოცნების“ თავმჯდომარე დღესაც ირწმუნება, რომ ოპოზიციაში ერთმანეთს აბულინგებენ.

მმართველი პარტიის ლიდერის მტკიცებით, ოპონენტებში არავის არ აქვს თავი, შემოვიდეს, კომისიის მუშაობაში ჩაერთოს და დაამტკიცოს თუნდაც 1%-იანი სიყალბე.

"ოპოზიციაში ერთმანეთს აბულინგებენ, რათა ვინმეს არ წამოსცდეს, რომ არჩევნები არ გაყალბდა, არადა, არავის აქვს თავი, შემოვიდეს და კომისიის მუშაობაში ჩაერთოს"- უთხრა მან მედიას.

დეპუტატის თქმითვე, "ბოლო წლების ყველაზე დიდი აფიორაა ქართველ ხალხს დააჯერო ან ამის მცდელობა გქონდეს, რომ არჩევნები გაყალბდა".
"ჩვენ შევთავაზეთ, რომ თუ ეს ნარატივი 1%-ით მაინც სჯერათ, თავად შემოვიდნენ, გამოიძიონ და თავად დადონ იურიდიული საფუძველი იმაზე სასაუბროდ, რომ არჩევნები არათუ ტოტალურად, არამედ 1%-ით მაინც გაყალბდა. ამის თავი არავის არ აქვს. დარწმუნებული ვართ, რომ ეს ასე არ იყო. დღეს დავაინიცირეთ კონკრეტული პროექტი, რომლის მიხედვითაც იქმნება შესაბამისი კომისია. კეთილი ინებონ, მოვიდნენ, მიიღონ ამ კომისიის მუშაობაში მონაწილეობა. თავადვე გამოიძიონ, ასეთი ხარვეზი ან გავლენა არჩევნებზე დაადგინონ ან ბოდიში მოუხადონ საზოგადოებას, რომ მთელი ამ ხნის განმავლობაში ატყუებდნენ. „გაყალბებული არჩევნები“ გახდა მთავარი ნარატივი, რომლის იგნორირებაც ღალატად შერაცხეს და შეუფასეს ერთმანეთს. როგორც კი დღეს რომელიმე ოპოზიციონერი იტყვის, რომ არჩევნების გაყალბებასთან დაკავშირებით შეიძლება კითხვის ნიშნები ჰქონდეს და ეს ასე არ არის, ის არის ოპოზიციის თვალში მოღალატე, რაც არის ბულინგი“,- განაცხადა მდინარაძემ.