ხმაური და დაპირისპირება იყო პრეზიდენტის ადმინისტრაციასთან, სადაც "ქართული მარშის" წევრები აქციას მართავდნენ.

ისინი სალომე ზურაბიშვილთან შეხვედრას მოითხოვდნენ და მოსალაპარაკებლად 10 წუთი მისცეს, დროის ამოწურვის შემდეგ კი ეზოს ჭიშკარზე ბოქლომის დადება სცადეს, რისი საშუალებაც ადგილზე მობილიზებულმა სამართალდამცველებმა არ მისცეს. სწორედ ამ ფაქტს მოჰყვა დაპირისპირება, რის შედეგადაც "ქართული მარშის" ერთ-ერთი ლიდერი გიორგი გაბედავა და მოძრაობის კიდევ ერთი წევრი პოლიციამ დააკავა.

მარშის წევრები ზურაბიშვილისგან განმარტებას მოითხოვდნენ და მას დავით გარეჯის სამონასტრო კომპლექსთან დაკავშირებით გაკეთებული განცხადებები გამო აკრიტიკებდნენ:

„ერთ-ერთი ყველაზე დიდი დამნაშავე დავით გარეჯის დროებით დაკარგვისა, არის საქართველოს ე.წ. პრეზიდენტი სალომე ზურაბიშვილი. მისი პროვოკაციული ფრაზა არავითარი შემთხვევითობა არ იყო, რომელიც თავის დროზე დავით გარეჯში თქვა. ეს იყო მიმართული იმისკენ, რომ დაწყებულიყო ის პროცესები, რომელიც გარეჯში მიმდინარეობს. აზერბაიჯანელმა მესაზღვრეებმა ამოიწიეს ზემოთ და დაიკავეს ჩვენი ეკლესია-მონასტრები. მოვედით, რომ პასუხი ვაგებინოთ თავის ქმედებაზე და სასწრაფოდ მოვითხოვოთ ამ პრობლემის გადაწყვეტა“, - განაცხადა „ქართული მარშის“ ლიდერმა, სანდრო ბრეგაძემ.

პრეზიდენტის ადმინისტრაციასთან დაპირისპირების დროს დაკავებულები დიღმის პოლიციის განყოფილებაში არიან გადაყვანილი.