მოძრაობა "სირცხვილია" შაბათს დაუმორჩილებლობის დღეს აწყობს და დილიდან რესტორნებში ვიზიტს, ხოლო საღამოს 21:00 საათიდან, როდესაც ე.წ. კომენდანტის საათი დაიწყება, ფერადი მარშის მოწყობას გეგმავს - ამის შესახებ განცხადება სოციალურ ქსელში გავრცელდა:

"როდესაც ხელისუფლებას კრიზისიდან გამოსვლის არათუ რამე გეგმა აქვს, არამედ უფრო აღრმავებს მას და როდესაც ხელისუფლებას თავისი მოქალაქეების არ ესმის, პანდემიას კი მისთვის სასიკეთოდ და სხვებისთვის საზიანოდ იყენებს, მოქალაქეების დაუმორჩილებლობის დრო დგება!

შაბათს, 6 თებერვალს, 200-მდე რესტორანი აღარ დაემორჩილება მთავრობის დაუსაბუთებელ შეზღუდვებს და გაიხსნება. დილიდან შეგვიძლია ვესტუმროთ ბარებსა და რესტორნებს, ვისარგებლოთ მათი მომსახურებით და გავამხნევოთ მათი მფლობელები. ამ გადაწყვეტილების მიღება მარტივი არ არის და ჩვენი მხარდაჭერა მათთვის მნიშვნელოვანია.

საღამოს, ე.წ. კომენდანტის საათის დროს, ვგეგმავთ დაუმორჩილებლობის ფერად, მხიარულ და ბრჭყვიალა მარშს, რომელში მონაწილეობაც ყველა მსურველს შეუძლია. სასურველია, წამოიღოთ დოლები, ტამტამები, ნიღბები, სადღესასწაულო ქუდები და სხვა რეკვიზიტები, რომლებიც მარშს კიდევ უფრო ფერადსა და დაუმორჩილებელს გახდის. 20:00-ზე ვიკრიბებით პარლამენტთან!" - ნათქვამია განცხადებაში.

შეგახსენებთ, რომ სარესტორნო ბიზნესის წარმომადგენლებმა ასევე დააანონსეს შაბათს რესტორნების თვითნებურად გახსნა და ამუშავება.