"ოპოზიციას შანსი მივეცით, რომ რადიკალების მხრიდან ბულინგიდან გამოვიდნენ"- მამუკა მდინარაძე

პოლიტიკა - 13:18, 02 Feb, 2021

967

"ქართული ოცნების" ფრაქციის თავმჯდომარის, მამუკა მდინარაძის განცხადებით, პარტიის მიერ დღეს მიღებული გადაწყვეტილებით, ოპოზიციას მიეცა შანსი სახელმწიფოებრივად მოქცნენ.
"ჩვენ კიდევ ერთი შანსი მივეცით, რომ ისინი გამოვიდნენ რადიკალური ოპოზიციის ბულინგიდან და გადადგან ის ნაბიჯი, რომელიც ამ შემთხვევაში იქნება ერთი მხრივ, მოსახლეობის და ამომრჩევლის მინიმუმ 2/3-ის გამომხატველი. 39% არის ის რიცხვი, რომლებსაც წარმოადგენენ საპარლამენტო ოპოზიციის ის წარმომადგენლები, რომლებიც დღეს მანდატების შეწყვეტას ითხოვენ და რისგანაც ჩვენ თავს შევიკავებთ", - თქვა მამუკა მდინარაძემ.

მისივე თქმით, ამ ეტაპზე მიზანშეწონილია, თავი შევიკავონ ოპონენტების უფლებამოსილების შეწყვეტისგან და საკითხის ამგვარად მხარდაჭერისგან.
"ჩვენ დღეს დავუპირისპირეთ საპარლამენტო პროცედურა მათ შორის მათ გადაწყვეტილებას, რომ საბოტაჟი გამოუცხადონ საპარლამენტო მუშაობას და საპარლამენტო დემოკრატიას. ასევე, ჩვენ გავითვალისწინეთ არა 52%-ის, როგორც ისინი სპეკულაციურად აცხადებენ, არამედ რეალურად ამომრჩევლის 39%-ის პოზიციაც. არა მხოლოდ ამ 39%-ს, რომელსაც ის ადამიანები წარმოადგენენ, რომლებიც თავის მხრივ ითხოვენ სადეპუტატო უფლებამოსილების შეწყვეტას და უარს ამბობენ მანდატებზე, არამედ მთლიანი ამომრჩევლის ორი მესამედს, როგორც უკანასკნელი კვლევებითაც დადასტურდა, მიაჩნია, რომ მათ უნდა გააგრძელონ საპარლამენტო მუშაობაში მონაწილეობა. ამომრჩევლის ნება, საპარლამენტო საბოტაჟი და საპარლამენტო დემოკრატიის უგულებელყოფა პოზიტიური გაგებით ჩვენი მხრიდან, იყო გადაწყვეტილების საფუძველი, რომ თავი შეგვეკავებინა ამ საკითხის მხარდაჭერისგან"- განაცხადა დეპუტატმა.