შიდა ქართლის სამხარეო პოლიციის ახალი უფროსი ილია კვაღინიძე ეხმაურება მედიაში გავრცელებულ ინფორმაციას და აცხადებს, რომ არასდროს უმუშავია კუდ-ში, პოლიტიკოსები არ დაუტერორებია და აქციებზეც მხოლოდ საზოგადოებრივი წესრიგის დაცვის მიზნით არის ნამყოფი.

ამის შესახებ კვაღინიძემ სოციალურ ქსელში ვრცელი პოსტი გამოაქვეყნა:

"დღეს სხვადასხვა მედიასაშუალების მხრიდან ვრცელდება გადაუმოწმებელი და მცდარი ინფორმაცია ჩემ შესახებ, მათ შორის ვრცელდება სხვადასხვა ფოტოსურათი, რაზეც მტკიცებით ფორმაში საუბრობენ, რომ მე ვარ. მინდა აღვნიშნო, რომ მხოლოდ ერთ ფოტოზე ვჩანვარ, რომელიც გადაღებულია ჩემი მეგობრის სახლის აივანზე.

ასევე, ვრცელდება ცრუ ინფორმაცია, თითქოსდა მე ვმუშაობდი კონსტიტუციური უსაფრთხოების დეპარტამენტში. ხაზგასმით აღვნიშნავ, რომ ჩემი 16-წლიანი კარიერის განმავლობაში არასდროს მიმუშავია აღნიშნულ დეპარტამენტში. რაც შეეხება ბრალდებას, თითქოს და მე „ვატერორებდი“ რომელიმე პოლიტიკური პარტიის წარმომადგენლებს, ასევე არის ტყუილი.

თუკი სადმე, რომელიმე პოლიტიკური პარტიის აქციაზე ვყოფილვარ, ეს განპირობებული იყო მხოლოდ და მხოლოდ საზოგადოებრივი წესრიგის დაცვის მიზნით" , - წერს კვაღინიძე.