ხმაური და დაპირისპირებაა ამ წუთებში ჩხოროწყუს მერიასთან, სადაც სამოქალაქო აქტივისტები მერის, დავით გოგუას გადადგომას ითხოვენ.

აქცია მას შემდეგ დაიგეგმა, რაც სოციალურ ქსელში გავრცელდა შოკისმომგვრელი კადრები, სადაც ჩანს, რომ მეშვიდე კლასის მოსწავლეებს მერიის საპირფარეშო დაალაგებინეს.

მერიასთან მობილიზებული არიან სამართალდამცველები, ისინი აქციის მონაწილეებს იმ სხდომაზე დასწრების საშუალებას არ აძლევენ, სადაც გოგუა სწორედ საპირფარეშოების დასუფთავებისთვის სკანდალს განიხილავს.

მომხდარზე გამოძიება გამოძიება სისხლის სამართლის კოდექსის 150-ე მუხლით დაიწყო, რაც იძულებას გულისხმობს.

ბავშვების თქმით, არ იცოდნენ, რომ საპირფარეშოების დასასუფთავებლად მიყავდათ. მათი განცხადებით, ისინი საპირფარეშოების დასასუფთავებლად ეთერ ჯაფარიძემ წაიყვანა.

ეთერ ჯაფარიძე მერიის დასუფთავების სამსახურის ყოფილი თანამშრომელია და მას ხელშეკრულება 31 დეკემბერს ამოეწურა.

თავად ჯაფარიძე კი აცხადებს, რომ მომხდარს არ ნანობს.

"დასანანი აქ არაფერია. როცა მთლიანად აქცია კეთდება და დედამიწის დღეს ორდღიანია და ყველა ბავშვები ტყესა და ღრეში რომ არიან, ის დანაშაული არის თუ არა?", - აცხადებს ჯაფარიძე.