"პატრიოტთა ალიანსის" ლიდერი, ირმა ინაშვილი, ივერი მელაშვილის და ნატალია ილიჩოვას საპატიმროდან გათავისუფლებას ეხმაურება და პოლიტკურ კონტექსტზე საუბრობს, მისი თქმით ეს გათავსუფლება "ქართული ოცნების" ვაჭრობის შედეგია.

ინაშვილი აცხადებს, რომ "ქართული ოცნება" და სიტყვა ვაჭრობა ერთმანეთის სინონიმებია - მისივე თქმით, "ოცნება" სხვა საკითხებთან ერთად, დავითგარეჯის თემითაც ვაჭრობს, წინააღმდეგ შემთხვევაში ივერი მელაშვილი არ უნდა გაეთავისუფლებინათ.

"არჩევნების გაყალბების შემდეგ ქართული ოცნება ციხიდან ათავისუფლებს მელაშვილს, რომელსაც პროკურატურის განცხადებით, რეალურად ჩადენილ დანაშაულში ედავებიან და რომელიც აცხადებს, რომ დავით გარეჯი საქართველო არაა. მთელ ამ სიტუაციას პოლიტიკური კონტექსტი ახლავს. რა დროს და რატომ მოხდა ამ ადამიანების გათავისუფლება, თუ ეს მძიმე დანაშაული ჩადენილია და ჩადენილია, როგორც პროკურატურა ამბობს, რატომ ათავისუფლებენ? აქ პოლიტიკური კონტექსტი ერთ-ერთი მთავარია.

ნათელია, რომ ქართული ოცნება ვაჭრობს. ქართული ოცნება და ვაჭრობა ერთმანეთის სინონიმები გახდა. ქართული ოცნება ვაჭრობს არჩევნებით, მანდატებით, დავითგარეჯის თემით და მზადაა, ნახევარი ქვეყანა დათმოს, ოღონდ ვინმე შეიტანოს გაყალბებული გზით ფორმირებულ არჩევნებში. ქართული ოცნება ვაჭრობს კოვიდით, ყოვლად უგუნური აკრძალვებით, რასაც ვეწინააღმდეგებით". - ამბობს ირმა ინაშვილი.

მისივე თქმით, "ე.წ. პოლიტპატიმრების საკითხი იხილებოდა და არის გარიგების ნაწილი. ასე მართავს ქართული ოცნება ქვეყანას, ასეთი იაფფასიანი გადაწყვეტილებები",- განაცხადა ინაშვილმა.