"კარტოგრაფების გათავისუფლება ცვლის ყველაფერს... ნდობის აღდგენისკენ ეს არის დიდი და კარგი ნაბიჯი"

"კარტოგრაფების გათავისუფლება ცვლის ყველაფერს... ნდობის აღდგენისკენ ეს არის დიდი და კარგი ნაბიჯი" - ელისაშვილი კარტოგრაფების გათავისუფლებაზე

პოლიტიკა - 20:13, 28 Jan, 2021

1003

"მოქალაქეების" ერთ-ერთი ლიდერი, ალეკო ელისაშვილი აცხადებს, რომ კარტოგრაფების გათავისუფლება მოლაპარაკების შედეგია.

ელისაშვილის თქმით, მოლაპრაკების მაგიდასთან დასახელებული იყო ხუთი გვარი, მათგან ოთხი გათავისუფლდა, პოლიტპატიმრად რჩება გიორგი რურუა და სწორედ ამიტომ, ელისაშვილი ოპოზიციას მოუწოდებს დაბრუნდნენ მოლაპარაკების მაგიდასთან და ერთად იბრძოლონ.

ელისაშვილი თვლის, რომ კარტოგრაფების გათავისუფლება "დიდი და კარგი ნაბიჯია" ნდობის აღდგენისკენ.

"მთელი დღეა ვუსმენ, ვისაც არ ეზარება ყველა იბრალებს თითქოს მათ გაუთავისუფლებიათ, ეს არის მოლაპარაკების შედეგი. ერთმნიშვნელოვნად და სრული პასუხისმგებლობით ვამბობ, რომ თავიდან, როდესაც მოლაპარაკება იყო, ხუთი გვარი იყო მოლაპარაკების მაგიდაზე და ხუთიდან ოთხი არის გათავისუფლებული და გათავისუფლებულია მხოლოდ და მხოლოდ იმიტომ, რომ მოლაპარაკება მიმდინარეობდა.

მე არ მითქვამს რომ ჩვენი დამსახურებაა, მე ვთქვი, რომ ეს არის მოლაპარაკების შედეგი. ბოლოს ისე აღმოჩნდა, რომ დანარჩენი ოპოზიცია გაბუტულია დგას ქუჩაში და იქიდან იქნევს მუშტებს და მოლაპარაკების მაგიდასთან დავრჩით ჩვენი პარტია. კარგად გაიხსენებთ, ერთი კვირაც არ გასულა მას შემდეგ, რაც ეს ადამიანები გაათავისუფლეს... თუ ვინმეს უნდა, რომ მეხუთე გვარი, რომელიც დარჩა საპატიმროში იმ პოლიტპატიმართა სიიდან ისიც გათავისუფლებული იყოს. ჩვენ კი ნუ გველაპარაკებიან ნიშნის მოგებით. არამედ დაბრუნდნენ მოლაპარაკების მაგიდასთან და ერთად ვიბრძოლოთ იმ ადამიანის გათავისუფლებისთვისაც.

დღევანდელი გათავისუფლება კარტოგრაფების რა თქმა უნდა ცვლის ყველაფერს. ჩვენ რას ვამბობდით - პარლამენტში შვეალთ იმ შემთხვევაში თუ ჩვენი მოთხოვნები შესრულდება თქო. ერთ-ერთი მთავარი მოთხოვნა იყო ეს, რომ ვამბობდით არავითარ შემთხვევაში არ შევალთ, ხო. ნდობის აღდგენისკენ ეს არის დიდი და კარგი ნაბიჯი. ხვალ დილით პარლამენტში არ შევდივართ იმიტომ, რომ საარჩევნო საკითხები არ არის გადაწყვეტილი", - ამბობს ელისაშვილი.

შეგახსენებთ, რომ თბილისის საქალაქო სასამართლოს გარდაწყვეტილებით, ნატალია ილიჩოვასა და ივერი მელაშვილის აღმკვეთი ღონისძიება - პატიმრობა 20-20 ათასლარიანი გირაოთი შეეცვალათ და სასამართლო დატოვეს.