მარნეულის სოფელ კუშჩუსთან, გაგის ციხეზე მარნეულისა და კუმურდოს ეპარქიის მიერ აღმართული ჯვარი დაუდგენელმა პირებმა მოიპარეს. ადგილზე შეკრებილი არიან სოფლის მოსახელობის ქრისტიანული ნაწილი და მეუფე გიორგი ჯამდელიანის მისვლას ელოდებიან. ისინი ახალი ჯვრის აღმართვას გეგმავენ და მომხდარს პროვოკაციად აფასებენ:

"ჩვენი სოფლიდან არავინ ჩაიდენდა ამას, ჩვენი სიმბოლოცაა ეს დროშა, ჩვენი სამშობლოა და ეს ყველაფერი გარედან სიტუაციის დაძაბვის მცდელობას ჰგავს - ეს დროშა და ჯვარი წლებია, აქ არის და რატომ ახლა გაქრა მაინცდამაინც?", - განაცხადა ერთ-ერთმა ადგილობრივმა.

მომხდართან დაკავშირებით კომენტარი მუსლიმთა თემის უმაღლესმა წარმომადგენელმაც გააკეთა:

"ჩვენ რელიგიურ ნიშნებსა და სიმბოლიკებს პატივს ვცემთ, ასეც უნდა იყოს. ჯვარიც, დროშაც პატივსაცემი სიმბოლიკებია. ვინმე ჯვარის მიმართ ასე თუ იქცევა, ეს დასაგმობია და ვგმობთ კიდეც. თუმცა ჯვარიც და სხვა მსგავსი სიმბოლიკები თავის ადგილზე ლამაზია. ეს სოფელი აზერბაიჯანელებით დასახლებული სოფლებია და აქ ამ ჯვრის აღმართვა არასწორი იყო .

ახლა კი ასეთი საეჭვო პროვოკაციული ამბავი მოხდა. როცა მარნეულის ბიუჯეტიდან ეკლესიის დაიფნანსება გავაპროტესტეთ, მაშინ ნარიმანოვის თემით დაძაბეს სიტუაცია. ახლა კი მარნეულის სოფლებში მიწების ამბებზე ადგილობრივი ეპარქიის მღვდლებსა და გლეხებს შორის დაპირისპირებას ამ ჯვრის აღების ფაქტი დაემთხვა.

გონივრული ეჭვი ჩნდება რომ ამას სპეციალურად აკეთებენ რომ ხახლხის გრძნობებით ითამაშონ და ვითარება დაძაბონ. მეუფე გიორგი ჯამდელიანი სულ ძაბავს ურთიერთობას აქ ამ რეგიონში. ეს ჩვენი ქვეყანაა და სიმშვიდე გვინდა და არა ვითარების დაძაბვა. ჩვენ აქ სიყვარულით და ურთიერთპატივისცემით უნდა ვიცხოვროთ", - განაცხადა სრულიად საქართველოს მუსლიმთა უმაღლესი რელიგიური სამმართველოს შეიხმა მირთაგ ასადოვმა.