"ოცნების" ჩუმი სიფრთხილე: რატომ აჭიანურებს მმართველი პარტია ოპოზიციისთვის მანდატის გაუქმებას "უტიფრად იტყვიან, რომ..."

პოლიტიკა - 16:12, 26 Jan, 2021

1186

მიუხედავად იმისა, რომ ოპოზიციონერი დეპუტატების საპარლამენტო მანდატების გაუქმებას პარლამენტი 2 თებერვალს გეგმავს, მაინც ბოლომდე არაა გადაწყვეტილი, სურს თუ არა ოცნებას, ერთპარტიული პარლამენტი ოფიციალურად გააფორმოს.

პარლამენტის ვიცე-სპიკერის გია ვოლსკის განცხადებით, მან ჯერ არ იცის, რა გადაწყვეტილებას მიიღებს პარლამენტი მანდატების გაუქმებასთან დაკავშირებით. ვოლსკი აქვე განმარტავს, რომ "ოცნება" სიფრთხილეს იჩენს, რადგან მანდატების გაუქმების შემთხვევაში ოპოზიციას დესტრუქციული ქმედებების მიზეზს მისცემენ:

„მანდატების შეწყვეტა რამდენიმე გარემოების გამო დამაზიანებელი იქნება. პირველი არის ის, რომ მოლაპარაკების მაგიდასთან უტიფრად იტყვიან, რომ კი, პარლამენტში შესვლაზე დაგიჯერებდით, მაგრამ აი, მანდატი შემიწყვიტეს. მოსალოდნელია ამ თემით სპეკულირება. არის მეორე საკითხი - აი, ჩვენ იქ არა ვართ, ესე იგი, პარლამენტი ოპოზიციის გარეშე მოქმედებს. აქედან გამომდინარეობს მანდატების შეწყვეტაზე მათი გააფთრებული მოთხოვნა. არის მესამე გარემოებაც - ვაი და, ვიღაც გონს მოვიდეს, საერთაშორისო პარტნიორების შეძახილი და თუნდაც ჩატარებული გამოკითხვების შედეგები გაითვალისწინოს. ამის გათვალისწინებით ყალიბდება დამოკიდებულება საკითხის მიმართ. ვალდებული ვართ, საკითხს არა მხოლოდ პოლიტიკური პლატფორმიდან, არამედ სახელმწიფოს ინტერესებიდან მივუდგეთ - სახელმწიფოს სჭირდება მანდატების შეჩერება თუ სჭირდება, რომ მანდატები არ შევაჩეროთ. უნდა ვიმსჯელოთ აქედან გამომდინარე“, - განაცხადა გია ვოლსკიმ.