"ჩვენ კარგად უნდა გვქონდეს გაცნობიერებული, რა ბრძოლაში ვართ და თუ ამ ბრძოლაში რომელიმე სამოქალაქო აქტივისტმა შეცდომა დაუშვა, მას რჩევა და რეკომენდაცია სჭირდება და არა დაგმობა"

"ჩვენ კარგად უნდა გვქონდეს გაცნობიერებული, რა ბრძოლაში ვართ და თუ ამ ბრძოლაში რომელიმე სამოქალაქო აქტივისტმა შეცდომა დაუშვა, მას რჩევა და რეკომენდაცია სჭირდება და არა დაგმობა" - მელია

პოლიტიკა - 16:09, 25 Jan, 2021

908

"ჩვენ, ოპოზიციურად განწყობილ პოლიტიკოსებს და მოქალაქეებსაც, კარგად უნდა გვქონდეს გაცნობიერებული, რა ბრძოლაში ვართ. თუ ამ ბრძოლაში რომელიმე სამოქალაქო აქტივისტმა შეცდომა დაუშვა, მას რჩევა და რეკომენდაცია სჭირდება და არა დაგმობა" - ასე ეხმაურება ერთიანი ნაციონალური მოძრაობის თავმჯდომარე ნიკა მელია ბათუმში განვითარებული მოვლენების შედეგად ახალგაზრდა აქტივისტის დაკავებას.

მელიას თქმით, როცა გამოსული ხარ გარეთ და ველზე იბრძვი, შესაძლოა, კონკრეტულმა ადამიანებმა შეცდომებიც დაუშვან.

"სამწუხაროა, როდესაც შვიდმაგი სტანდარტი არსებობს. ძალადობა არასდროს არის მისასალმებელი, ვინც არ უნდა იყოს ფიგურანტი. თუმცა, ჩვენ ასეთი უამრავი ფაქტი გვქონდა. იგივე, როდესაც იარაღით დარბიან, უბნებს არბევენ, კორცხელის შემთხვევა, ასევე მოძალადეები ბორჯომში.

ჩვენ, ოპოზიციურად განწყობილ პოლიტიკოსებს და მოქალაქეებსაც კარგად უნდა გვქონდეს გაცნობიერებული, რა ბრძოლაში ვართ. ესაა უთანასწორო ბრძოლა დიდ ბოროტებასთან, ოლიგარქიულ მანქანასთან და თუ ამ ბრძოლაში რომელიმე სამოქალაქო აქტივისტმა დაუშვა შეცდომა, მას რჩევა და რეკომენდაცია სჭირდება და არა დაგმობა და მისი დასჯისკენ მოთხოვნების გაჟღერება. სწორედ ასეთმა მიდგომამ გაუხსნა ხელ-ფეხი ხელისუფლებას, ეს ახალგაზრდა დაეკავებინათ და ამ პოზიციას ვერავინ გადამათქმევინებს.

რას ვეუბნებით უამრავ გულანთებულ ახალგაზრდას?! სახლიდან გამოუსვლელად კომენტარებისა და შეფასებების კეთება ადვილია, მაგრამ რთულია იყო ველზე მებრძოლი, სადაც, შესაძლოა, შეცდომაც დაუშვა.

თუ ვთანხმდებით, რომ ქვეყანაში არც ავტოკრატიაა და არც დიქტატურასთან ვართ ახლოს, კი ბატონო, მარტივია მორალური პოლიციელის როლის მორგება" - აღნიშნა მელიამ.