ხმაურია ამ წუთებში ბათუმის პოლიციის მთავარ სამმართველოსთან, სადაც აქტივისტები არასამთავრობო ორგანიზაცია "ალტერნატივას" წევრის ირაკლი ფანგანის დაკავებას აპროტესტებენ.

აქციის მონაწილეების განცხადებით, ადგილი აქვს შერჩევით სამართალს და ფანგანი უკანონოდ არის დაკავებული. მათი განცხადებით, არა ერთი ფაქტი მომხდარა, სადაც თავდასხმის ობიექტი ოპოზიციურად განწყობილი პირი ყოფილა, თუმცა ასეთ ინციდენტებთან დაკავშირებით გამოძიება არც ერთხელ დაწყებულა.

პოლიციის მთავარ სამმართველოსთან სამართალდამცველები არიან მობილიზებულები და აქციის მონაწილეებს დაშლისკენ მოუწოდებენ.

შეგახსენებთ, რომ არასამთავრობო ორგანიზაცია "ალტერნატივას" წევრი ირაკლი ფანგანი პოლიციამ ბათუმში მომხდარი ინციდენტის გამო დააკავა - მან "რესპუბლიკური პარტიის" ყოფილ წევრს ირაკლი ჩავლეიშვილს, რომელმაც ბოიკოტის რეჟიმი შეწყვიტა და აჭარის უმაღლეს საბჭოში შევიდა, თავზე ნაგავი დააყარა.
გამოძიება 239-ე და 156-ე მუხლით დაიწყო, რაც დევნასა და ხულიგნობას გულისხმობს.