ჩავლეიშვილისთვის ნაგვის დაყრის გამო "ალტერნატივას" წევრი დააკავეს

პოლიტიკა - 17:51, 24 Jan, 2021

1215

არასამთავრობო ორგანიზაცია „ალტერნატივას“ წევრი ირაკლი ფანგანი პოლიციამ დააკავა - ამის შესახებ ინფორმაციას თავად ორგანიზაცია სოციალურ ქსელში ავრცელებს:

"ა/ო ,,ალტერნატივას" წევრი ირაკლი ფანგანი დააკავეს გუშინ მომხდარი ფაქტის გამო...

ბათუმის პოლიციამ სრული მობილიზაცია გამოაცხადა ადამიანის დაკავების გამო , რომელიც იმყოფებოდა ოფისში, სამუშაო რეჟიმში და საკუთარი ფეხით ცხადდებოდა პოლიციის განყოფილებაში" - წერია გავრცელებულ განცხადებაში.

სპეციალურ განცხადებას ავრცელებს შსს-ც და ირაკლი ფანგანის დაკავების ფაქტს განმარტავს:

"შინაგან საქმეთა სამინისტროს აჭარის პოლიციის დეპარტამენტის ბათუმის საქალაქო სამმართველოს თანამშრომლებმა, ჩატარებული ოპერატიულ-საგამოძიებო მოქმედებების შედეგად, 23 იანვარს ბათუმში მომხდარ ინციდენტთან დაკავშირებით, 1991 წელს დაბადებული ი.ფ., მოსამართლის განჩინების საფუძველზე, დევნის ბრალდებით დააკავეს.

გამოძიებით დადგინდა, რომ ბრალდებული მონაწილეობდა ბათუმში, ერას მოედნის მიმდებარე ტერიტორიაზე, არასამთავრობო ორგანიზაცია „ალტერნატივას“ და პარტია „ერთიანი ნაციონალური მოძრაობის“ ახალგაზრდული ფრთის წარმომადგენლების მხრიდან აჭარის უმაღლესი საბჭოს დეპუტატის - ირაკლი ჩავლეიშვილის წინააღმდეგ მიმდინარე აქციაში. ი.ფ.-მ დეპუტატის მიმართ განახორციელა დევნა და ურნიდან ნაგავი თავზე გადააყარა.
მომხდარ ფაქტზე გამოძიება საქართველოს სისხლის სამართლის კოდექსის 156-ე და 239-ე მუხლებით მიმდინარეობს, რაც დევნასა და ხულიგნობას გულისხმობს" - წერია უწყების მიერ გავრცელებულ ინფორმაციაში.

შეგახსენებთ, რომ ბათუმში ირაკლი ჩავლეიშვილისთვის ნაგვის დაყრის ფაქტზე გამოძიება 239-ე და 156-ე მუხლით დაიწყო, რაც დევნასა და ხულიგნობას გულისხმობს.

ჩავლეიშვილისთვის ნაგვის თავზე დაყრა იმის გამო მოხდა, რომ მან "რესპუბლიკური პარტია" დატოვა, ბოიკოტზე უარი თქვა და აჭარის უმაღლეს საბჭოში შევიდა, რამას საზოგადოების აგრესია გამოიწვია.