"თვენახევარია ივანიშვილის რეჟიმის პროპაგანდის პარტნიორია და გუშინ საკუთარი უზნეობის რეკორდები მოხსნა"

"თვენახევარია ივანიშვილის რეჟიმის პროპაგანდის პარტნიორია და გუშინ საკუთარი უზნეობის რეკორდები მოხსნა" - ბოკერია ელისაშვილზე

პოლიტიკა - 20:17, 20 Jan, 2021

1122

"ევროპული საქართველოს" ერთ-ერთი ლიდერი, გიგა ბოკერია აცხადებს, რომ ალეკო ელისაშვილი არის ივანიშვილის რეჟიმის პროპაგანდის პარტნიორი.

ბოკერიას შეფასებით, გუშინ პირდაპირ ეთერში ელისაშვილმა უზნეობის საკუთარი რეკორდები მოხსნა.

“თითქმის თვენახევარია ოპოზიციის წინააღმდეგ კამპანია დაიწყეს ბატონმა ელისაშვილმა და მისმა ამფსონმა იოსელიანმა და მერე შეუერთდა „გირჩის“ განაყოფის რამდენიმე ადამიანი. ძალიან სამარცხვინო ფორმა შეიძინა ამან, რაც დრო გავიდა და გუშინ საერთოდ საკუთარი რეკორდები მოხსნა ბატონმა ელისაშვილმა. განსხვავებული აზრი საერთოდ არ იქნებოდა პრობლემა, თუმცა გააჩნია აზრსაც, მაგრამ რამდენიმე პირმა ოპოზიციის წინააღმდეგ კამპანია დაიწყო ლანძღვით, იმ ბრალდებების გამეორებით, რასაც ივანიშვილის რეჟიმი ტირაჟირებს ხოლმე, რომ „რევოლუციისთვის, ძალადობისთვის ემზადებიან“, დაკომლექსება და ძირითადად ჩვენს სახელს იყენებენ ხოლმე, რომ ვიღაც ზეწოლის ქვეშაა, რაც ძალიან დიდი შეურაცხყოფაა ადამიანებისთვის, ვისაც თავისი ნება და პოზიცია აქვს. საზოგადოების თვალში უიმედობის დანერგვისთვის ამას ივანიშვილის რეჟიმი ეფექტურად გამოიყენებს, ამაში მდგომარეობს ზიანი.

ძალიან ცნობილი უხეში გამონათქვამია: (პოლიტიკურად ვამბობ, ფიზიოლოგიურად არა) - სიბინძურეს რომ შეეხები, შენც ბინძური ხარ. გუშინ რაც ვიხილეთ, რა მიზანსცენაც იქნა დადგმული ბატონი ხაზარაძის წინააღმდეგ, ძალიან უსიამოვნო საყურებელია. არაკორექტული იყო როგორც მოხდა ეს ყველაფერი. თუ დებატებია, უნდა აუხსნა, რომ დებატებია, თუ არადა საჩხუბრად მიშვება მითუმეტეს ადამიანის, რომელსაც არანაირი მუხრუჭი არ აქვს მორალური, არ არის კარგი საქციელი მედიის მხრიდან. ეს ყველაფერი გაცდა იმ ზღვარს, როცა მკაფიო უნდა იყოს ყველასთვის, როგორ უყურებს ამ რამდენიმე ადამიანის საქციელს,“ - განაცხადა ბოკერიამ.