ელისაშვილი ოპოზიციას ემიჯნება - ვაშაძემ შეხვედრაზე უარი განაცხადა

პოლიტიკა - 17:00, 18 Jan, 2021

588

"მოქალაქეების" ლიდერი ალეკო ელისაშვილი აცხადებს, რომ გიორგი ვაშაძეს გიგა ბოკერია და ვანო მერაბიშვილი გარკვეული კომპრომატებით აშანტაჟებენ - აღნიშნული განცხადება ელისაშვილმა ჟურნალისტებთან გააკეთა.

ელისაშვილისა და "გირჩის" წევრის იაგო ხვიჩიას განმარტებით, თავდაპირველად ვაშაძე მზად იყო მათთან მოლაპარაკებისთვის, თუმცა, შემდეგ აზრი შეიცვალა, რამაც გარკვეული ეჭვები გააჩინა.
დღეს ვაშაძემ განაცხადა, რომ ელისაშვილთან და გირჩის განაყოფთან ასეთ ფორმატში მოლაპარაკებას არ აპირებს, რის შემდეგაც ელისაშვილმა კომპრომატების არსებობაზე ჟურნალისტებთან ისაუბრა:
"იაგო ხვიჩიას აქვს ეჭვი, რომ, შესაძლოა, რაღაც კომპრომატები აქვთ გიორგი ვაშაძის ან სხვა ოპოზიციური ლიდერების წინააღმდეგ მაგალითად ვანო მერაბიშვილს, გიგა ბოკერიას, ძველი ხელისუფლების წარმომადგენლებს და ამით მანიპულირებენ. ამის მტკიცებულება არ მაქვს, ეს უბრალოდ ეჭვია, მე რასაც ვხედავ, არის ის, რომ ორი დღის წინ გიორგი ვაშაძე არა თუ თანახმა იყო, არამედ კმაყოფილი იყო აღნიშნული პერსპექტივით, დაგეგმილი იყო და ჩანიშნული იყო შეხვედრა, მოულოდნელად კი გააუქმა და თქვა, რომ ამ ფორმატში შეხვედრის წინააღმდეგი იყო. ეს რა თქმა უნდა, გარკვეულ ეჭვებს აჩენს" - განაცხადა ელისაშვილმა.
აღნიშნულ განცხადებას გიორგი ვაშაძეც გამოეხმაურა და ელისაშვილის მოსაზრებას ჭორაობა უწოდა და ელისაშვილთან და გირჩთან შეხვედრაზე უარის თქმა მის პირად პოლიტიკურ გადაწყვეტილებად შეაფასა:
"ვინმეს რომ რამე კომპრომატი ჰქონოდა ჩემზე, დიდი ხნის წინ გავრცელდებოდა ეს კომპრომატი და გამოიყენებდნენ. ამ საკითხთან დაკავშირებით არა ერთხელ გვქონია განსხვავებული პოზიციები, თუნდაც მის მიერ დასახელებულ პიროვნებებთან, ასე რომ, ეს არის ტყუილი, ჭორაობა და ზღაპარი და ძალიან ვთხოვ ალეკოსაც, იაგოსაც, სულ ყველას, რომ აქცენტი იყოს "ქათული ოცნება" და არა ოპოზიცია. სიმართლე გითხრათ, დიდ ყურადღებას არ ვაქცევ ასეთ განცხადებებს, უკვე იმუნიტეტი გამომიმუშავდა პოლიტიკაში ყოფნის პერიოდში, მაგრამ რასაც ხელს უშლის, ნამდვილად ხელს უშლის ასეთი პოზიცია მოლაპარაკებების შედეგიანად დასრულებას" - განაცხადა გიორგი ვაშაძემ.