პანკისში მეზობლის მიერ მოკლული 40 წლის იბრაჰიმ ქავთარაშვილი დღეს დუისის სასაფლაოზე დაკრძალეს. რაც შეეხება მკვლელობაში ეჭვმიტანილ ხიზირ გაურგაშვილს კი სამართალდამცველები ამ დრომდე ეძებენ.

გაურგაშვილმა ქავთარაშვილს ცივი იარაღით 12 სასიკვდილო ჭრილობა მიაყენა. გავრცელებული ცნობით, ის არაფხიზელ მდგომარეობაში იმყოფებოდა. მან დანაშაულის ჩადენიდან მალევე დატოვა სოფელი და მის პოვნას ნათესავებიც ვერ ახერხებენ.

გამოძიება განზრახ მკვლელობის მუხლით მიმდინარეობს, პანკისში კი ორივე გვარის წარმომადგენლები უახლოეს პერიოდში შეიკრიბებიან და შერიგებაზე იმსჯელებენ. დუისის მკვიდრთა უმეტესობა შერიგების მომხრეა:

"არა მგონია, ერთი ადამიანის გულისთვის მთელი გვარი რომ გადაეკიდოს ერთმანეთს, ეგ არ იქნება. გვარის უფროსები ხვდებიან ერთმანეთს, დაილაპარაკებენ, სხვა გვარებიც ერთვებიან მაგაში, რომ ეს მშვიდობიანად დამთავრდეს," - განაცხადა ადგილობრივმა ალი ქავთარაშვილმა.