"კობახიძე კალაძისთვის ხელქვეითია..." - რატომ უპირებდნენ ცემას ირაკლი კობახიძეს დეპუტატები და რას ჰყვება მასზე ყოფილი თანაგუნდელი

პოლიტიკა - 14:56, 15 Jan, 2021

5777

"ქართული ოცნების გედის სიმღერა" - ასე აფასებს ივანიშვილის გუნდის ყოფილი წევრი ეკა ბესელია მმართველი გუნდის ყრილობას, ხოლო ირაკლი კობახიძეს, რომელიც ოვანიშვილმა თავის მემკვიდრედ დატოვა პარტიის თავმჯდომარის რანგში - ბესელია უპრინციპოს და პარტიის წევრებს შორის კონფლიქტის კერას უწოდებს.

ბესელია ამბობს, რომ ირაკლი კობახიძე, რომელიც კონფლიქტების წამომწყები იყო, მის დანთებულ ცეცხლს ივანიშვილი აქრობდა.

"ხვალინდელი ყრილობა გედის ბოლო სიმღერას ჰგავს, რადგან ეს ხელისუფლების როლში ოცნების ბოლო ყრილობაა. მე ამ პარტიას ოპოზიციაში ვხედავ მალე, პრაქტიკულად უკვე დასრულებულს, იმიტომ, რომ ხშირად ვამბობდი, როდესაც ივანიშვილი აღარ იქნებოდა პარტიაში, და ეს დრო, რა თქმა უნდა, დადგებოდა, ეს პარტია დასრულდებოდა, რადგან ერთადერთი მიზიდულობის ცენტრი შექმნილი იყო ივანიშვილის მიერ.

რატომ დატოვა კობახიძე, ძალიან მარტივი პასუხი მაქვს ამაზე - ის იყო ყველაზე უპირობო და უსიტყვო დავალებების შემსრულებელი. ის არის კატეგორია, რომელიც მხოლოდ ივანიშვილისთვის საამებლად საუბრობდა. მას არ აწუხებს საკუთარი პრინციპები. კობახიძე ივანიშვილისთვის სიმშვიდის გარანტია.

კობახიძეს აქვს ნიჭი - აჩენს ცხელ კერებს, კონფლიქტებს ადამიანებს შორის, ცარიელ ადგილას ანთებს ხანძარს. კობახიძე თავად ქმნიდა ეგეთ კონფლიქტებს, მის გაჩენილ ხანძრებს აქრობდა ივანიშვილი პერიოდულად, ახლა არავინაა, ვისაც შეუძლია, დაიჭიროს ეს სიტუაცია. წინა მოწვევის პარლამენტში რამდენიმე დეპუტატმა, მახსოვს, მასზე ლამის ხელით გაიწია და რომ არა ივანიშვილი კარგი ალიყური მოხვდებოდა ალბათ.

კობახიძე დარჩება ალბათ ერთი პატარა ოფისის ხელმძღვანელად და ის რეალურად ამ პარტიას ვეღარც შეინარჩუნებს. მას არც პარლამერნტის თავმჯდომარის რანგში არ ცემდა პატივს არავინ. კობახიძე კალაძისთვის ხელქვეითია, თუ ის ასეთად დარჩება, ასატანი იქნება, კალაძე უყურებს კობახიძეს, როგორც მის თანამშრომელს, შესაბამისად, ეს პარტია ჩვენ მალე შეიძლება დავინახოთ, როგორც ოპოზიციურ ფლანგზე გადანაცვლებული პარტია" - განაცხადა ბესელიამ ტვ პირველის ეთერში.