პარლამენტთან კარავში შეკრებილი სამოქალაქო აქტივისტები დღეს ეროვნულ-დემოკრატიული პარტიის ლიდერმა ბაჩუკი ქარდავამ მოინახულა. აქტივისტები უკვე 45-ე დღეა კარავში იმყოფებიან და მიტაცებულ არჩევნებს აპროტესტებენ.

მოძრაობა "საქართველოსთვის" წევრის ნიკა ნარსიას განცხადებით, ხელისუფლებას მოუწევს ვადამდელი არჩევნების დანიშნვა, რადგან ძალიან მალე ხალხის პროტესტი უფრო მასშტაბური გახდება.

"მოვუწოდებ ჩემს თანატოლებს, განსაკუთრებით თბილისში, რომ მეტად იაქტიურონ. ჩემს მაგალითს გეტყვით - მე ჩამოვედი საბერძნეთიდან იმის გამო, რომ ქვეყანას მართავს ივანიშვილი. 45 დღეა, რაც კარავი გავშალეთ, თავიდან ერთი იყო, ახლა მეორეც შეემატა. მალე ზუგდიდში გაიშლება კარვები და ეს ქალაქი იქნება გამარჯვების ცენტრი, აქ ხალხი ყველაზე მეტად არის მოტივირებული. საბოლოოდ პროტესტის ყველა ტალღა თბილისში მოიყრის თავს - ჩვენ აქ გამარჯვებისთვის ვართ მოსულები და ეს გამარჯვება რამოდენიმე კვირაში აუცილებლად აღინიშნება. პირადად მე ხელისუფლებისგან დათმობას არ ველოდები, მაგრამ ხალხის დიდი პროტესტის ფონზე ხელისუფლბას აუცილებლად მოუწევს დანიშნოს ვადამდელი არჩევნები. ქართველი ხალხი იმსახურებს იმას, რომ ჰქონდეს დემოკრატიული სახელმწიფო, ჰქონდეს ხმის მიცემის უფლება და აირჩიოს ის, ვინც მას სურს" - განაცხადა ნარსიამ.