"იანვრის ბოლოს წარვადგენთ ახალ ადამიანებს, რომლებიც პოლიტიკაში არასოდეს ყოფილან" - ნიკა მელია პარტიის ახალი სამოქმედო გეგმის პრეზენტაციას აანონსებს

პოლიტიკა - 19:44, 13 Jan, 2021

1360

"ერთიანი ნაციონალური მოძრაობის" ახალმა თავმჯდომარემ, ნიკა მელიამ განაცხადა, რომ მისი პირველი ნაბიჯი პარტიაში იქნება სამოქმედო გეგმის წარდგენა და პარტიაში ახალი ადამიანების მიღება.

მელიას განმარტებით, ახალგაზრდებისთვის, არ იყო კარი ღია იმ სიფართოვით როგორსაც ისურვებდნენ, სწორედ ამიტომ მიიღო ეს გადაწყვეტილება. ამ ეტაპზე პარტია რამდენიმე ათეული ადამიანის მიღებას გეგმავს.

მისივე თქმით, ახალ წევრებსა და გეგმას, სავარაუდოდ 24 ან 31 იანვარს, პრეზენტაციის სახით წარმოადგენს.

"ყველა ვეტერანი პარტიის წევრი, ბედნიერი უნდა იყოს იმით, რომ მოდის ახალი ადამიანი პარტიაში. ახალგაზრდებისთვის, არ იყო კარი ღია იმ სიფართოვით როგორსაც ვისურვებდით. თუ შევსება მოდიოდა ნაციონალურ მოძრაობაში, ეს მხოლოდ არჩევნებამდე, რომ სია დაკოპლექტებულიყო ახალი სახეებით.

იანვრის ბოლოს ჩვენ გვექნება პრეზენტაცია, სადაც ჩვენ წარვადგენთ, სამოქმედო გეგმას და ახალ, წარმატებულ ადამიანებს, რომელთა უმრავლესობა არასდროს ყოფილა პოლიტიკურ პროცესებში ჩართული და პარტიული პოლიტიკა არ უკეთებიათ, ნაციონალური მოძრაობის მხარდამჭერებიც არ ყოფილან, თითქმის დასრულებულია მოლაპარაკებები, პრეზენტაცია იქნება ან 24 იანვარს ან 31 იანვარს" , – ამბობს მელია.

მელიას თქმით, ბიძინა ივანიშვილის მსგავსი პირები, ქვეყნის მოდერნიზაციისკენ სწრაფვას ვერ შეაფერხებენ

"ვერც ერთი და ვერც ორი და ვერც სამი ბიძინა ივანიშვილი, საკუთარი ავლადიდებით, პროცესს, რომელიც სახელმწიფოს გაჯანსაღებას და კიდევ უფრო მოდერნიზებას შეუწყობს ხელს, რომლის ავტორიც არის ნაციონალური მოძრაობა, ვერ შეაჩერებს" , – ამბობს ნიკა მელია გადაცემაში "დღის სტუმარი".

შეგახსნებთ, რომ ნაციონალურმა მოძრაობამ პარტიის თავმჯდომარედ ნიკა მელია ოფიციალურად 2020 წლის 27 დეკემბერს აირჩია.