სახალხო დამცველი , ნინო ლომჯარია სოფელ ბუკნარში რელიგიურ ნიადაგზე მომხდარ დაპირისპირებას ეხმაურება.

ლომჯარიას თქმით, შესაძლოა, ასეთი ფაქტი არ მომხდარიყო მანამდე არსებული რელიგიური დაპირისპირებები სათანადოდ რომ გამოეძიებინათ.

"ეს შეიძლება იყოს იმის გაგრძელებაც, რომ 2012-2016 წლებში მომხდარ რელიგიურ ნიშნით დაპირისპირებებს, სამწუხაროდ, სამართლებრივი შედეგები არ მოჰყოლია. მთელი რიგი გამოძიებები შეწყდა და დასრულდა ხანდაზმულობის გამო. ჩვენ ვერ მოვიპოვეთ ინფორმაცია, რომ მეჩეთის მშენებლობის ნებართვის მისაღებად შესაბამის თვითმმართველობის ორგანოში არის წარდგენილი განაცხადი. ამ კონკრეტულ შემთხვევაში, რამდენადაც ჩემთვის ცნობილია, კონფლიქტი წარმოშვა სწორედ ლოცვის ფაქტმა, სალოცავის არსებობამ და არა მეჩეთის მშენებლობის საკითხმა," - განაცხადა სახალხო დამცველმა.

აღნიშნულ ფაქტს ასევე გამოეხმაურა ადამიანის უფლებების სწავლებისა და მონიტორინგის ცენტრის თანასწორობის პოლიტიკის პროგრამის დირექტორი , თამთა მიქელაძე და დაპირისპირების დეტალებზე ისაუბრა. მისი თქმით, ინფორმირებული იყო ადგილობრივი თვითმმართველობა, თუმცა მას სათანადო ზომები არ მიუღია კონფლიქტის დროული გადაჭრისთვის , რასაც ძალადობრივი დაპირისპირება მოჰყვა.

"მუსლიმები უკვე რამდენიმე წელია, სოფელში ცხოვრობენ და ბუნებრივად აქვთ სალოცავი სივრცის არსებობის საჭიროება და როგორც ფაქტობრივი გარემოებები აჩვენებს, ამ დაძაბულობის შესახებ იყო ინფორმირებული ადგილობრივი თვითმმართველობა, თუმცა მას სათანადო ზომები არ მიუღია კონფლიქტის დროული გადაჭრისთვის და დაახლოებით ერთი თვის წინ დაწყებული კონფლიქტი გუშინ და გუშინწინ კიდევ უფრო ძალადობრივ დაპირისპირებაში გადაიზარდა," - აღნიშნა მიქელაძემ.

ცნობისთვის, მუსლიმი თემის წარმომადგენლები ითხოვენ, რომ მუსლიმურ სამლოცველოში ლოცვის საშუალება ჰქონდეთ. მათი ინფორმაციით, აღნიშნულს ადგილობრივი ქრისტიანული მოსახლეობა ეწინააღმდეგება.