პარტია "მოქალაქეების" ლიდერი ალეკო ელისაშვილი ივანიშვილის პოლიტიკიდან წასვლას ეხმაურება და აცხადებს, რომ ივანიშვილი იმ სამომავლო პრობლემებს გაექცა, რომელიც ქვეყანას უახლოეს მომავალში ელის წინ:

"ჩემი აღქმით ბიძინა ივანიშვილი თუ მართლა წავა, არ ვიცი წავა-არ წავა, მაგ კაცს მტერი ენდო, დატოვებს ოდნავ უფრო პლურალისტურ ქვეყანას გამოხატვისა და სიტყვის თავისუფლების თვალსაზრისით და გაცილებით უფრო ღარიბ და უპერსპექტივოს, ვიდრე ჩაიბარა 2012 წელს. ეს არის რეალობა და თუ მართლა გადაწყვიტა წასვლა, დიდი ალბათობით მხოლოდ იმიტომ, რომ გაექცეს იმ სამომავლო პრობლემებს, რაც ამ ქვეყანას ელის წინ უახლოეს მომავალში. უბრალოდ ვერ გაართვა თავი ქვეყნის წინსვლას, პერსპექტიულ, წარმატებულ ქვეყნად ჩამოყალიბებას და უბრალოდ უნდა ქუდი დაიხუროს და წავიდეს," - აცხადებს ალეკო ელისაშვილი.

"გირჩის" წევრის ალექსანდრე რაქვიაშვილის შეფასებით, თუ ივანიშვილი ფორმალურად არ წასულა და ის მართლაც ტოვებს პოლიტიკას, ამას ყველა მალე დაინახავს, რადგან ცვლილებები აშკარა იქნება:

"პირველ რიგში თუ მართლა ბიძინა ივანიშვილი წავიდა პოლიტიკიდან, ჩვენ ამას დავინახავთ იმიტომ, რომ ისეთ ცენტრალიზებულ მართვის სისტემაში, რომელიც ჩვენს ქვეყანაში არსებობს, თუ ზევიდან იერარქი წავიდა, მართლა წავიდა, ჩვენ დავინახავთ ბევრ ცვლილებას. ეს იქნება თანამდებობების ცვლილება და ზოგადად ურთიერთობის, დამოკიდებულების ცვლილება, ამიტომ ეს ძალიან მალე გამოჩნდება წავიდა თუ არა. თუ ასეთი ცვლილებები არ მოხდა, თუ ჩვენ დავინახეთ, რომ მთავრობა იგივე დარჩა, პოლიტიკური პროცესები იგივე სტილში იმართება, მაშინ ჩავთვალოთ, რომ ეს ფორმალური ნაბიჯი იყო, დე ფაქტო ივანიშვილი დარჩა მმართველობაში, უბრალოდ ფორმალური თანამდებობები დატოვა," - აცხადებს ალექსანდრე რაქვიაშვილი.