"ევროპული საქართველოს" ერთ-ერთი ლიდერი გიგა ბოკერია ეხმაურება პარლამენტში "პატრიოტთა ალიანსის" წევრების შესვლასა და ოცნების მხრიდან ინფორმაციის გაჟღერებას, თითქოს პარლამენტს უკვე ოპოზიციაც ჰყავს.

ბოკერიას განცხადებით, პარლამენტი ახლა უფრო ერთპარტიულია და ეს სწორედ ალიანსის წევრების შესვლამ დაადასტურა:

"ეს არის ერთპარტიული პარლამენტი და ამ ხალხის შესვლა პარლამენტში არის დადასტურება ერთპარტიულობის. ის უტიფრად სამარცხვინო და სასაცილო „ნიუს ლეთერი“, რაც ჩვენს პარტნიორებს ზეიმით დაუგზავნა მთავრობამ, ნახეთ, რა კარგი, პროდასავლური ხალხი შემოვიდა პარლამენტშიო, არის დასტური ამ სამარცხვინო ერთპარტიული პარლამენტის, რომელიც ქართველი ხალხის ნებას არ გამოხატავს. პარლამენტი ახლა კიდევ უფრო ერთპარტიულია. ზოგჯერ რაღაცის უარყოფით კიდევ უფრო ხაზს უსვამ იმას, რაც ხარ. მე რაც ვთქვი, აქედან გამომდინარე, ისინი ოპოზიციურ ნაწილში შეიძლება განვიხილოთ? - არა! ამის ზეიმით აღნიშვნა აჩვენებს რა დონის დიპლომატიასთან გვაქვს საქმე. ეს არის კატასტროფა, შინაარსს თავი რომ დავანებოთ. თუ არ ვცდები, ივანიშვილის ახალი ვარსკვლავი კუჭავა არის ამის კურატორი. ეს ცალკე ამბავია კომპეტენციის, რომ დასაცინი ხარ, როცა ასე ლაპარაკობ. ივანიშვილის რეჟიმის წარმომადგენლების ზეიმი არის ერთპარტიულობის დადასტურება და კიდევ ერთხელ შეხსენება, რომ ეს პარლამენტი ქართველი ხალხის ნებას არ გამოხატავს.

ოპოზიციას შორის კონსულტაციები არ შეწყვეტილა. ჩვენ, ოპოზიციის 99%-ს და ქართულ საზოგადოებას გვაქვს ერთი ამოცანა, რომ მივაღწიოთ ვადამდელ არჩევნებს, რასაც სჭირდება პოლიტპატიმრების გათავისუფლება, საარჩევნო ადმინისტრაციაში და საარჩევნო კანონმდებლობაში ფუნდამენტური ცვლილებები, ჩვენ, ჩვენი პაკეტი გაგზავნილი გვაქვს და დეტალურად განხილული. ახლა ივანიშვილმა და ყველა მისმა პოლიტიკურმა „კლოუნმა“ უნდა გაიაზრონ, რომ ეს არის ამ კრიზისის განმუხტვის ერთადერთი გზა" - განაცხადა ბოკერიამ.