საქართველოს რაგბის კავშირის ახლად არჩეულ პრეზიდენტს, ირაკლი აბუსერიძეს რეგისტრაცია შეუჩერეს.

საჯარო რეესტრს განცხადებით საპრეზიდენტო არჩევნებში მონაწილე ერთ-ერთმა კანდიდატმა, ბაჩო ხურციძემ მიმართა - მათივე ინფორმაციით, რეგისტრაციის შეჩერების მიზეზი წესდების დარღვევით ჩატარებული განმეორებითი საერთო კრებაა, რომელიც 2020 წლის 24 თებერვალს ჩაშლილი საერთო კრებიდან არაუგვიანეს 30 დღეში უნდა ჩატარებულიყო, თუმცა პანდემიის გამო არ გამართულა.

რაგბის კავშირის პრეზიდენტის , ირაკლი აბუსერიძის განცხადებით, არჩევნები ლეგიტიმურად იყო ჩატარებული და ეს ყველამ აღიარა. აბუსერიძის თქმით, ადამიანი, რომელიც ამის უკან დგას, ქართული რაგბის მტერია.

"არჩევნები ლეგიტიმურად იყო ჩატარებული. გამგეობის თავმჯდომარემ, ყრილობამ, სპორტის სამინისტროს წარმომადგენლებმა და ნოტარიუსმა - ყველამ აღიარა, რომ ეს არჩევნები ლეგიტიმური იყო. როგორც ჩანს, არსებობს რაღაც ხარვეზი და ამას ხვალიდან მივხედავთ, ჩემთვის სუსტია ის არგუმენტები, რაც მათ უწერიათ. ვნახავთ, ხურციძეა თუ ვინ დგას ამის უკან, პირდაპირ შემიძლია გითხრათ, რომ ის ქართული რაგბის მტერია. შესარჩევი წელი გვაქვს საკვალიფიკაციო, ასევე რუსეთის თამაში გვიახლოვდება და ეს არის პირადი ინტერესებიდან გამომდინარე. თუ ვერ ეგუება დამარცხებას, შეეძლო ყრილობაზე გამოცხადებულიყო და დაეყენებინა ეს საკითხი“, -განაცხადა აბუსერიძემ.

ცნობისთვის, რაგბის კავშირის პრეზიდენტად ირაკლი აბუსერიძე30 დეკემბერს აირჩიეს. მას მხარი დელეგატთა უმრავლესობამ 31 ხმით დაუჭირა. 10 ხმა მიიღო რაგბის კავშირის ყოფილმა პრეზიდენტმა გოჩა სვანიძემ.